ایشین ڈویلپمنٹ بینک (ADB) نے پاکستان کو جامع ماحولیاتی حکمتِ عملی اور پالیسی فریم ورک تیار کرنے میں مدد دینے پر اتفاق کیا ہے، جس کا مقصد ملک کی ماحولیاتی لچک اور موسمیاتی مطابقت کو مضبوط بنانا ہے۔
یہ فیصلہ اے ڈی بی کے ڈائریکٹر جنرل برونو کاراسکو کی قیادت میں آنے والے وفد اور وفاقی وزیر برائے موسمیاتی تبدیلی و ماحولیاتی ہم آہنگی ڈاکٹر مصدق ملک اور دیگر اعلیٰ حکام کے درمیان ملاقات میں کیا گیا۔
ملاقات میں دونوں فریقین نے موسمیاتی تبدیلی کے چیلنجز سے نمٹنے کے لیے جامع اور مستقبل بین حکمتِ عملی اپنانے کی اہمیت پر زور دیا۔ خاص طور پر نوجوانوں کی قیادت میں ماحولیاتی منصوبوں کو تیاری، رہنمائی اور مالی معاونت فراہم کرنے کی ضرورت کو اجاگر کیا گیا، تاکہ یہ منصوبے مقامی اور عالمی سطح پر مؤثر ثابت ہو سکیں۔
اجلاس میں موسمیاتی مالیات اور سرمایہ کاری میں مشترکہ منصوبوں کے مواقع پر بھی تبادلہ خیال کیا گیا، تاکہ پائیدار ترقی کے لیے بڑے پیمانے پر وسائل کو متحرک کیا جا سکے۔
ڈاکٹر مصدق ملک نے منصوبہ بندی سے عملدرآمد کی جانب بڑھنے کی ضرورت پر زور دیا اور اے ڈی بی کو یقین دہانی کرائی کہ پاکستان تمام مراحل میں مکمل تعاون فراہم کرے گا تاکہ طے شدہ اہداف کو مؤثر انداز میں حاصل کیا جا سکے۔
دونوں فریقین نے کاربن کریڈٹ مارکیٹس میں شراکت داری کے امکانات پر بھی بات کی اور ماحولیاتی کارکردگی اور اخراج میں کمی کو مالی فائدے میں بدلنے کے ممکنہ طریقہ کار تلاش کرنے پر اتفاق کیا۔
