کراچی میں آج (جمعہ) شدید گرمی پڑنے کا امکان ہے، جہاں درجہ حرارت 41 ڈگری سینٹی گریڈ تک پہنچ سکتا ہے۔
شہر کا موجودہ درجہ حرارت 32 ڈگری سینٹی گریڈ ریکارڈ کیا گیا ہے، جب کہ ہوائیں 15 کلومیٹر فی گھنٹہ کی رفتار سے چل رہی ہیں اور ہوا میں نمی کا تناسب 62 فیصد ہے۔ کراچی شدید گرمی کی لہر کی لپیٹ میں ہے اور شہری بلند درجہ حرارت کو برداشت کر رہے ہیں۔
دوسری جانب نیشنل ایمرجنسی آپریشنز سینٹر (NEOC) نے ایک ہنگامی ایڈوائزری جاری کی ہے، جس میں خبردار کیا گیا ہے کہ آئندہ 24 گھنٹوں کے دوران ملک کے مختلف علاقوں پر متعدد فعال موسمی نظام اثرانداز ہوں گے۔
اسلام آباد اور راولپنڈی کو خاص طور پر خطرہ لاحق ہے، جہاں دو موسمی نظاموں کے انضمام سے آج رات تیز ہواؤں اور شدید بارش کا امکان ظاہر کیا گیا ہے۔
خیبر پختونخوا، شمالی اور جنوب مشرقی پنجاب میں بھی شدید موسم کی پیش گوئی کی گئی ہے، جس میں ژالہ باری، آندھی اور موسلا دھار بارش شامل ہے۔
