پاکستانی یوٹیوبر سعد الرحمٰن، جو ڈکی بھائی کے نام سے مشہور ہیں، نے جیل سے رہائی کے بعد اپنے پہلے ولاگ سے متعلق ہونے والی آمدنی کی خبروں پر خاموشی توڑ دی ہے اور واضح کیا ہے کہ وڈیو کے کروڑوں ویوز کے باوجود انہیں اس سے کوئی کمائی حاصل نہیں ہوئی۔
ڈکی بھائی کو نومبر کے آخر میں ضمانت پر رہائی ملی تھی، اس سے قبل وہ جوئے سے متعلق ایپس کی تشہیر کے الزام میں گرفتار ہوئے تھے۔ رہائی کے چند ہی دن بعد انہوں نے دوبارہ یوٹیوب پر ولاگنگ کا آغاز کیا، جس کا پہلا ولاگ 1 کروڑ 50 لاکھ سے زائد بار دیکھا گیا۔ اس کے بعد سوشل میڈیا پر یہ دعوے گردش کرنے لگے کہ انہوں نے ایک ہی وڈیو سے لاکھوں یا کروڑوں روپے کما لیے ہیں۔
تاہم اپنے حالیہ ولاگ میں ڈکی بھائی نے ان تمام دعوؤں کو مسترد کرتے ہوئے بتایا کہ اس وقت انہیں اپنے یوٹیوب چینل تک مکمل رسائی حاصل نہیں ہے۔ ان کے مطابق وہ نہ تو خود وڈیوز اپلوڈ کر سکتے ہیں اور نہ ہی ڈیلیٹ، بلکہ ان کا کردار صرف ایڈیٹنگ تک محدود ہے۔
انہوں نے یہ بھی انکشاف کیا کہ ان کا گوگل ایڈسینس اکاؤنٹ بلاک ہے، جس کی وجہ سے وہ نہ تو آمدنی دیکھ سکتے ہیں اور نہ ہی کسی قسم کی کمائی حاصل ہو رہی ہے۔ ڈکی بھائی کے بقول رہائی کے بعد اپلوڈ کی گئی کسی بھی وڈیو سے انہیں تاحال کوئی رقم موصول نہیں ہوئی۔
مایوسی کا اظہار کرتے ہوئے انہوں نے کہا کہ ان کے ساتھ ناانصافی ہو رہی ہے، تاہم وہ فی الحال کئی معاملات پر خاموش رہنے کو ترجیح دے رہے ہیں۔ ساتھ ہی انہوں نے بتایا کہ ان کے ریسٹورنٹ سے متعلق تمام مالی اور انتظامی امور اس وقت ان کے پارٹنر عریب سنبھال رہے ہیں۔
ڈکی بھائی کی وضاحت کے بعد ولاگ کی کمائی سے متعلق گردش کرنے والی افواہوں کا خاتمہ ہو گیا ہے، جب کہ یہ بھی سامنے آیا ہے کہ قانونی مسائل کے باوجود انہیں اب بھی پیشہ ورانہ رکاوٹوں کا سامنا ہے۔
