نومبر 9، 2025
ویب ڈیسک
اقوامِ متحدہ کے عالمی موسمیاتی ادارے (WMO) نے خبردار کیا ہے کہ سال 2025 ممکنہ طور پر ریکارڈ شدہ تاریخ کے گرم ترین سالوں میں سے ایک ہوگا۔ ادارے کی تازہ رپورٹ کے مطابق جنوری سے اگست 2025 کے درمیان اوسط عالمی درجہ حرارت صنعتی انقلاب سے پہلے کے دور کے مقابلے میں 1.42 ڈگری سینٹی گریڈ زیادہ ریکارڈ کیا گیا ہے، جس میں ±0.12 ڈگری کا ممکنہ فرق شامل ہے۔
رپورٹ میں بتایا گیا ہے کہ گزشتہ 11 سال (2015 سے 2025) کے درمیان ہر سال ریکارڈ کی گئی 176 سالہ تاریخ کے 11 گرم ترین سالوں میں شامل رہا ہے۔ مزید یہ کہ گزشتہ تین سال (2023، 2024، 2025) اب تک کے سب سے زیادہ گرم سال قرار دیے گئے ہیں۔
عالمی موسمیاتی ادارے کی سیکریٹری جنرل سیلسٹے ساؤلو نے کہا کہ یہ اعداد و شمار "غیر معمولی درجہ حرارت کے تسلسل” کی عکاسی کرتے ہیں، جو فضا میں گرین ہاؤس گیسوں کی تاریخی بلند سطح کا نتیجہ ہیں۔ ان کا کہنا تھا کہ عالمی درجہ حرارت میں مسلسل اضافہ ظاہر کرتا ہے کہ اب وقت ہاتھ سے نکلتا جا رہا ہے۔
رپورٹ میں مزید کہا گیا ہے کہ اگرچہ دنیا نے ابھی تک 1.5 ڈگری سینٹی گریڈ کی طویل المدتی حد کو مکمل طور پر عبور نہیں کیا، لیکن اس ہدف کے نیچے رہنے کے امکانات تیزی سے کم ہو رہے ہیں۔
