وزیر جامعات و بورڈز محمد اسماعیل راہو اور چیئرمین انٹر بورڈ کراچی فقیر محمد لاکھو کی شرکت
کراچی: ورلڈ ٹیچرز ڈے 2025 کے موقع پر اساتذہ اور طلبہ کے اعزاز میں ایک شاندار تقریب بحریہ آڈیٹوریم کارساز کراچی میں منعقد ہوئی، جس کا اہتمام ڈائریکٹوریٹ آف انسپکشن اینڈ رجسٹریشن آف پرائیویٹ انسٹی ٹیوشنز سندھ اور آل سندھ پرائیویٹ اسکولز اینڈ کالجز ایسوسی ایشن نے مشترکہ طور پر کیا۔ تقریب میں صوبہ سندھ بھر کے ممتاز اساتذہ کی خدمات کو سراہا گیا اور پوزیشن ہولڈر طلبہ کی کامیابیوں کا جشن منایا گیا۔
وزیر برائے جامعات و بورڈز حکومت سندھ محمد اسماعیل راہو تقریب کے مہمانِ خصوصی تھے، جب کہ میئر کراچی مرتضیٰ وہاب صدیقی نے خصوصی مہمان کی حیثیت سے شرکت کی۔ تقریب میں دیگر معزز شخصیات میں رکن صوبائی اسمبلی اور مشیر برائے اقلیتی امور ڈاکٹر شام سندر ایڈوانی، وائس چانسلر این ای ڈی یونیورسٹی پروفیسر ڈاکٹر محمد طفیل، ایگزیکٹو ڈائریکٹر آئی بی سی سی پاکستان ڈاکٹر غلام علی ملاح، چیئرمین انٹر بورڈ کراچی فقیر محمد لاکھو، چیئرمین سندھ بورڈ آف ٹیکنیکل ایجوکیشن مشرف علی راجپوت، اور سندھ کے مختلف تعلیمی بورڈز — بشمول حیدرآباد، شہید بے نظیر آباد، میرپورخاص اور سکھر کے چیئرمینز نے شرکت کی۔
تقریب کا آغاز تلاوتِ کلامِ پاک اور نعتِ رسولِ مقبول ﷺ سے ہوا۔ رفیعہ جاوید، ایڈیشنل ڈائریکٹر ڈائریکٹوریٹ آف انسپکشن اینڈ رجسٹریشن آف پرائیویٹ انسٹی ٹیوشنز سندھ نے استقبالیہ خطاب کیا۔
تقریب کے دوران معزز مہمانان — جن میں وزیر جامعات و بورڈز محمد اسماعیل راہو، میئر کراچی مرتضیٰ وہاب صدیقی، چیئرمین انٹر بورڈ فقیر محمد لاکھو اور چیئرمین سندھ بورڈ آف ٹیکنیکل ایجوکیشن مشرف علی راجپوت شامل تھے — نے نمایاں کارکردگی دکھانے والے اساتذہ کو “Exemplary Educator Awards” سے نوازا۔
اپنے خطاب میں وزیر جامعات و بورڈز محمد اسماعیل راہو نے کہا کہ اساتذہ کی عظمت الفاظ میں بیان نہیں کی جا سکتی۔ سندھ حکومت اساتذہ کے وقار میں اضافے اور تعلیمی اداروں کی بہتری کے لیے پرعزم ہے۔ انہوں نے مزید کہا کہ آج ہم ان معلمین کے ساتھ اُن طلبہ کو بھی خراجِ تحسین پیش کرتے ہیں جنہوں نے اپنی محنت اور کارکردگی سے والدین اور اداروں کا نام روشن کیا۔
بعد ازاں وزیر جامعات و بورڈز نے پوزیشن ہولڈر طلبہ کو انعامات اور شیلڈز سے نوازا تاکہ ان کی محنت، قابلیت اور نمایاں کارکردگی کا اعتراف کیا جا سکے۔
میئر کراچی مرتضیٰ وہاب صدیقی نے اپنے خطاب میں کہا کہ اساتذہ ہماری قوم کے وہ خاموش ہیرو ہیں جو آنے والی نسلوں کو سنوارتے ہیں۔ تعلیم کے فروغ میں ان کی خدمات کو سلام پیش کرتا ہوں۔
آل سندھ پرائیویٹ اسکولز اینڈ کالجز ایسوسی ایشن کے چیئرمین سید حیدر علی اور ایگزیکٹو ڈائریکٹر آئی بی سی سی ڈاکٹر غلام علی ملاح نے بھی اساتذہ کی انتھک خدمات اور تعلیم کے فروغ میں ان کے کردار کو سراہا۔
تقریب کے اختتام پر تمام معزز مہمانانِ گرامی کو یادگاری سووینیئرز (Souvenirs) پیش کیے گئے، اور اساتذہ و طلبہ کی خدمات کو خراجِ تحسین پیش کیا گیا۔
