نیشنل سائبر کرائم انویسٹی گیشن ایجنسی (این سی سی آئی اے) نے پاکستان تحریک انصاف (پی ٹی آئی) کی رہنما اور رکنِ قومی اسمبلی شاندانہ گلزار کے خلاف سوشل میڈیا پر ریاست مخالف مواد پھیلانے کے الزام میں مقدمہ درج کرلیا ہے۔
نیوز کے مطابق مقدمہ نمبر 296/2025 کے تحت شاندانہ گلزار پر الزام عائد کیا گیا ہے کہ انہوں نے سوشل میڈیا پلیٹ فارم ’ایکس‘ پر متعدد گمراہ کن ٹوئٹس اور ویڈیوز شیئر کیں، جن میں ریاستی اداروں کے خلاف اشتعال انگیز بیانات شامل تھے۔
ایف آئی آر میں کہا گیا ہے کہ ملزمہ نے اپنی پوسٹس کے ذریعے نسلی اور لسانی بنیادوں پر نفرت کو ہوا دینے کی کوشش کی، وزیراعظم پاکستان سے متعلق جعلی تصویر اور غلط معلومات پھیلائیں، اور ایک من گھڑت خبر میں ان پر اسرائیلی وزیراعظم سے ملاقات کا الزام لگایا۔
حکام کے مطابق اس جعلی خبر سے عوام میں بے چینی، خوف اور ریاستی اداروں کے خلاف بداعتمادی پیدا ہوئی۔ تحقیقات سے یہ ثابت ہوا کہ ملزمہ نے جان بوجھ کر فیک نیوز کے ذریعے ریاست مخالف بیانیہ آگے بڑھایا۔
مزید کہا گیا ہے کہ اس مہم میں شامل دیگر عناصر اور معاونین کی نشاندہی کے لیے تحقیقات جاری ہیں۔
