لاہور – معروف اداکارہ صبا قمر اپنے حالیہ پوڈکاسٹ انٹرویو میں کراچی کے بارے میں منفی ریمارکس دینے کے بعد سوشل میڈیا پر شدید تنقید کی زد میں آ گئی ہیں۔
پوڈکاسٹ کے دوران جب میزبان نے ان سے پوچھا کہ کیا وہ کام کے لیے کراچی منتقل ہونا پسند کریں گی، تو صبا قمر نے فوراً جواب دیا، “استغفراللہ، کبھی نہیں۔”
انہوں نے مزید کہا کہ وہ صرف کام کے لیے کراچی جاتی ہیں، اپنے پراجیکٹس مکمل کر کے فوراً واپس آ جاتی ہیں۔ ان کے مطابق، انہیں لاہور اور اسلام آباد کا ماحول زیادہ پسند ہے۔ صبا قمر نے یہ بھی کہا کہ موجودہ تمام ڈرامہ اور فلم پروجیکٹس جو کراچی میں شوٹ ہو رہے ہیں، انہیں اسلام آباد منتقل کر دینا چاہیے۔ ایک موقع پر وہ دھیمی آواز میں یہ بھی کہتی سنائی دیں، “مجھے کراچی پسند نہیں۔”
صبا قمر کے ان بیانات نے سوشل میڈیا پر ہنگامہ برپا کر دیا، جہاں مداحوں اور شوبز سے وابستہ افراد نے ان کے الفاظ کو “نازیبا” اور “غیر ذمہ دارانہ” قرار دیا۔
ایک صارف نے لکھا، “صبا قمر نے کراچی کے لیے استغفراللہ کہا — یہ انتہائی نامناسب ہے!” ایک اور صارف نے طنزیہ انداز میں کہا، “جو شہر اس کے کام اور شہرت کی وجہ بنا، وہی اس کے ناپسندیدہ بن گیا؟”
کئی صارفین نے کہا کہ ایسے بیانات صوبائی و لسانی اختلافات کو ہوا دیتے ہیں، جبکہ کچھ مداحوں نے صبا قمر کا دفاع کرتے ہوئے کہا کہ ہر شخص کو اپنی رہائش کے حوالے سے ذاتی پسند و ناپسند کا حق حاصل ہے۔
فی الحال، اداکارہ کی وضاحت کا انتظار کیا جا رہا ہے، جبکہ سوشل میڈیا پر یہ بحث تاحال جاری ہے۔
