کراچی – معروف اداکار نبیل ظفر نے طنزیہ انداز میں کہا ہے کہ کراچی کی سڑکوں پر گاڑی چلانے والے شہریوں کو جرمانے کے بجائے انعام دیا جانا چاہیے، کیونکہ اس شہر میں ڈرائیونگ کرنا کسی کارنامے سے کم نہیں۔
سوشل میڈیا پر ای چالان سسٹم پر تبصرہ کرتے ہوئے نبیل ظفر کا کہنا تھا کہ جو شخص کراچی کی ٹوٹی پھوٹی سڑکوں، بے ہنگم ٹریفک اور لاپرواہ ڈرائیورز کے درمیان اپنی گاڑی کو بحفاظت منزل تک پہنچا دیتا ہے، اسے چالان نہیں بلکہ داد ملنی چاہیے۔
انہوں نے کہا کہ کراچی کے شہری روزانہ ٹریفک جام، خراب سڑکوں اور بدانتظامی کا سامنا کرتے ہیں، لیکن اس کے باوجود صبر و تحمل کے ساتھ ڈرائیونگ کرتے ہیں، جو واقعی قابلِ تعریف ہے۔
واضح رہے کہ سندھ حکومت نے شہر کی مختلف شاہراہوں پر ای چالان سسٹم نافذ کر دیا ہے، جس کے بعد ہزاروں شہریوں کو جرمانے موصول ہو چکے ہیں۔ تاہم عوام اور مختلف سیاسی جماعتوں نے اس اقدام پر تنقید کرتے ہوئے مطالبہ کیا ہے کہ پہلے سڑکوں کی حالت بہتر بنائی جائے، پھر چالان سسٹم پر عمل کیا جائے۔
