لاہور – معروف پاکستانی اداکار زاہد احمد نے سوشل میڈیا پر کھل کر بات کرتے ہوئے اسے "شیطان کا کام” قرار دیا اور موجودہ دور کے طرزِ زندگی پر سخت تنقید کی۔
حال ہی میں ایک پوڈکاسٹ میں گفتگو کرتے ہوئے زاہد احمد نے کہا کہ "سوشل میڈیا شیطان کا کام ہے، اور جو لوگ اس پر مواد بناتے ہیں وہ جہنم میں جائیں گے۔”
انہوں نے تسلیم کیا کہ ان کا یہ بیان تنقید کا نشانہ بن سکتا ہے کیونکہ وہ خود بھی سوشل میڈیا استعمال کرتے ہیں، تاہم ان کا کہنا تھا کہ وہ صرف اپنا ذاتی مؤقف بیان کر رہے ہیں۔
زاہد احمد نے مزید کہا کہ اپنی نجی زندگی، بچوں اور روزمرہ معمولات کو عوام کے سامنے پیش کرنا درست عمل نہیں ہے۔ ان کے مطابق، سوشل میڈیا وہ ایجاد ہے جس نے انسانیت کو سب سے زیادہ نقصان پہنچایا ہے۔
ان کے اس بیان کے بعد سوشل میڈیا پر نئی بحث چھڑ گئی۔ کچھ صارفین نے ان کے خیالات کی تائید کرتے ہوئے انہیں سچ بولنے والا قرار دیا، جبکہ کئی نے انہیں حد سے زیادہ سخت مؤقف اختیار کرنے پر تنقید کا نشانہ بنایا۔
زاہد احمد، جو اپنے گہرے اور سنجیدہ کرداروں کے لیے جانے جاتے ہیں، نے اپنے کیریئر کا آغاز ریڈیو سے کیا، بعدازاں تھیٹر اور ٹیلی ویژن میں قدم رکھا اور اپنی منفرد اداکاری سے وسیع شہرت حاصل کی۔
