نومبر 10، 2025
ویب ڈیسک
سعودی عرب کے ولی عہد شہزادہ محمد بن سلمان نے مکہ مکرمہ میں "کنگ سلمان گیٹ” منصوبے کا باضابطہ اعلان کر دیا ہے، جس کے تحت مسجد الحرام کے اطراف میں توسیع کی جائے گی تاکہ مزید 9 لاکھ نمازیوں کے لیے جگہ فراہم کی جا سکے۔
یہ منصوبہ سعودی حکومت کی اُن مسلسل کاوشوں کا حصہ ہے جن کا مقصد ہر سال مکہ آنے والے لاکھوں زائرین اور عازمینِ حج و عمرہ کو بہتر سہولیات فراہم کرنا ہے۔ اس کے تحت نہ صرف عبادت کے لیے مزید وسیع اور منظم جگہ فراہم کی جائے گی بلکہ جدید سہولتیں اور بنیادی ڈھانچہ بھی تیار کیا جائے گا تاکہ زائرین کو آسانی اور سکون کے ساتھ عبادت کا موقع ملے۔
منصوبے کا ایک اہم مقصد مکہ مکرمہ کی ثقافتی و تاریخی شناخت کو بھی اجاگر کرنا ہے، تاکہ آنے والے زائرین روحانی تجربے کے ساتھ ساتھ شہر کے ورثے اور روایات کو قریب سے محسوس کر سکیں۔
"کنگ سلمان گیٹ” منصوبہ سعودی وژن 2030 کے اہداف کے مطابق ہے، جس کا مقصد شہریوں اور زائرین کی زندگی کے معیار کو بہتر بنانا اور مکہ مکرمہ کو ایک عالمی معیار کی روحانی اور ثقافتی منزل میں تبدیل کرنا ہے۔
