ایک امریکی ایرو اسپیس کمپنی نے برطانیہ کے علاقے کارن وال میں واقع سیٹلائٹ ارتھ اسٹیشن خریدنے کا اعلان کیا ہے تاکہ اپنے ڈیپ اسپیس کمیونیکیشن نیٹ ورک کو مزید مضبوط بنایا جا سکے۔
کمپنی کے مطابق وہ ہیلسٹن میں واقع گوون ہیلی ارتھ اسٹیشن کو 37 ملین پاؤنڈ کے معاہدے کے تحت حاصل کرے گی۔
اس معاہدے میں اسٹیشن کے 44 اینٹینا اور جدید ڈیپ اسپیس کمیونیکیشن سسٹم شامل ہیں، جسے اس نوعیت کے معروف نجی نیٹ ورکس میں شمار کیا جاتا ہے۔
یہ سہولت مستقبل کے قمری مشنز اور بین الاقوامی خلائی منصوبوں، خصوصاً آرٹیمس مشن جیسے پروگراموں کی معاونت کرے گی۔
ذمہ داران کے مطابق اس انضمام سے خلا میں رابطے کے لیے ایک مربوط اور مضبوط عالمی نظام قائم کرنے میں مدد ملے گی۔
انہوں نے کہا کہ صارفین کی جانب سے ایک ایسے مربوط اور قابلِ اعتماد کمیونیکیشن سسٹم کی طلب میں اضافہ ہوا ہے جو تمام ضروریات کو ایک ہی پلیٹ فارم پر پورا کر سکے۔
یہ معاہدہ رواں سال مکمل ہونے کی توقع ہے، جو ڈیپ اسپیس کمیونیکیشن کے شعبے میں ایک اہم پیش رفت قرار دی جا رہی ہے۔
