پاکستان میڈیکل اینڈ ڈینٹل کونسل (PMDC) نے ملک بھر میں میڈیکل اور ڈینٹل کالجز کی معیاری نگرانی کو جدید بنانے کے لیے ڈیجیٹل انسپکٹر ٹریننگ پروگرام کی تیاریاں مکمل کرلی ہیں۔
اسلام آباد میں PMDC ہیڈکوارٹرز میں اہم اجلاس ہوا جس میں 9 سے 11 دسمبر 2025 تک ہونے والی قومی تربیت کے انتظامات کو حتمی شکل دی گئی۔ اجلاس کی صدارت کونسل کے صدر نے کی، جبکہ ملک بھر سے 12 ماسٹر ٹرینرز نے شرکت کی۔
ٹیم نے ٹریننگ ماڈیولز، ڈیجیٹل انسپیکشن کے طریقہ کار، آلات کے استعمال اور رپورٹنگ سسٹم کا جائزہ لیا۔ حکام کے مطابق اس نظام سے معیاری جانچ میں شفافیت بڑھے گی اور انسانی غلطیوں میں کمی آئے گی۔
میٹنگ میں ایک متحدہ ڈیجیٹل پلیٹ فارم، انسپکٹر گائیڈ، دستاویزی پروٹوکولز اور رپورٹنگ فارمز کی منظوری بھی دی گئی۔ PMDC کا کہنا ہے کہ نیا نظام عالمی معیار کے مطابق اداروں کی کارکردگی جانچنے میں اہم کردار ادا کرے گا۔
