انٹرنیشنل کرکٹ کونسل (آئی سی سی) نے ٹیسٹ، ون ڈے اور ٹی ٹوئنٹی فارمیٹ کی تازہ رینکنگ جاری کر دی ہے، جس میں پاکستان کے نوجوان اسٹار صائم ایوب نے ٹی ٹوئنٹی کے نمبر ون آل راؤنڈر کی پوزیشن حاصل کرلی۔
ٹیسٹ بیٹرز کی فہرست میں انگلینڈ کے جو روٹ بدستور پہلے نمبر پر موجود ہیں، جبکہ آسٹریلیا کے ٹریوس ہیڈ ایک درجہ ترقی پاتے ہوئے پانچویں نمبر پر پہنچ گئے ہیں۔ سری لنکا کے کمیندو مینڈس چھٹے نمبر پر جبکہ پاکستان کے سعود شکیل 11ویں پوزیشن پر موجود ہیں۔
ٹیسٹ بولرز کی رینکنگ میں بھارت کے جسپریت بمراہ پہلی پوزیشن برقرار رکھے ہوئے ہیں۔ جنوبی افریقہ کے مارکو یانسن پانچ درجے ترقی کے ساتھ پانچویں نمبر پر پہنچ گئے۔ پاکستان کے نعمان علی تیسرے نمبر پر موجود ہیں جبکہ جنوبی افریقہ کے سائمن ہارمر 13 درجے چھلانگ لگا کر 11ویں پوزیشن پر آگئے۔
ٹیسٹ آل راؤنڈرز میں بھارت کے رویندرا جڈیجا پہلے نمبر پر ہیں جبکہ مارکو یانسن 4 درجے بہتری کے بعد دوسرے نمبر پر پہنچ گئے۔ جنوبی افریقہ کے سینوران ماتھوسامے 14 درجے ترقی کے ساتھ 20ویں نمبر پر آگئے۔
آئی سی سی ون ڈے بیٹرز رینکنگ
ون ڈے بیٹرز میں بھارت کے روہت شرما کا پہلا نمبر برقرار ہے۔ ویرات کوہلی ایک درجہ ترقی کے ساتھ چوتھی پوزیشن پر پہنچ گئے۔
پاکستان کے بابر اعظم کی چھٹی پوزیشن برقرار ہے۔
بھارت کے ایل راہول دو درجے بہتری کے ساتھ 14ویں نمبر پر آگئے۔
جنوبی افریقہ کے کوئنٹن ڈی کاک تین درجے تنزلی کے بعد 16ویں جگہ پر چلے گئے، جبکہ پاکستان کے فخر زمان ایک درجے بہتری کے ساتھ 25ویں نمبر پر آگئے۔
جنوبی افریقہ کے میتھیو بریز نے 17 درجے ترقی کے بعد 31ویں پوزیشن حاصل کرلی۔
آئی سی سی ون ڈے بولرز رینکنگ
ون ڈے بولرز میں افغانستان کے راشد خان بدستور پہلے نمبر پر ہیں، جبکہ بھارت کے کلد یپ یادیو ایک درجہ ترقی کے بعد چھٹی پوزیشن پر آگئے۔
آئی سی سی ون ڈے آل راؤنڈر رینکنگ
آل راؤنڈر کی فہرست میں افغانستان کے عظمت اللہ عمرزئی پہلی پوزیشن برقرار رکھے ہوئے ہیں، جب کہ جنوبی افریقہ کے مارکو یانسن 15 درجے بہتری کے بعد 20ویں مقام تک آگئے۔
