لاہور: لیاقت آباد کے علاقے میں 11 سالہ بچی کو ہراساں کرنے کے الزام میں وین ڈرائیور کو پولیس نے کارروائی کرتے ہوئے گرفتار کر لیا۔
ترجمان کے مطابق ڈی آئی جی آپریشنز کی ہدایت پر اے ایس پی ماڈل ٹاؤن کشمالہ فاروق نے خصوصی ٹاسک کے تحت ملزم کی تلاش شروع کی۔ ایس ایچ او لیاقت آباد اور ان کی ٹیم نے ملزم کو لیاقت آباد بازار سے ٹریس کرکے حراست میں لے لیا۔
اے ایس پی کشمالہ فاروق کا کہنا تھا کہ بچی اسکول سے وین کے ذریعے گھر واپس آ رہی تھی کہ دورانِ سفر ڈرائیور نے اس سے چھیڑ چھاڑ کی کوشش کی۔ بچی کے شور مچانے پر ملزم موقع سے فرار ہوگیا تھا، تاہم پولیس نے بعد ازاں اسے گرفتار کر کے مقدمہ درج کیا اور معاملہ جینڈر سیل کے سپرد کر دیا۔
ایس پی ماڈل ٹاؤن شہربانو نقوی نے بروقت کارروائی پر ایس ایچ او اور ٹیم کو سراہتے ہوئے کہا کہ بچوں کو ہراساں کرنے کے واقعات پر زیرو ٹالرنس پالیسی پر سختی سے عمل کیا جا رہا ہے۔
