ضلع انتظامیہ مری نے شدید موسمی حالات کے باعث مری اور کوٹلی ستیاں میں تمام سرکاری اور نجی تعلیمی اداروں کے لیے طویل سرمائی تعطیلات کا اعلان کر دیا ہے۔
پنجاب ایجوکیشن ڈیپارٹمنٹ کی جانب سے جاری کردہ اور چیف ایگزیکٹو آفیسر ڈسٹرکٹ ایجوکیشن اتھارٹی مری کی طرف سے جاری نوٹیفکیشن کے مطابق سرمائی تعطیلات 22 دسمبر سے شروع ہوں گی جو 7 مارچ تک جاری رہیں گی، جبکہ تمام اسکول اور کالجز 9 مارچ کو دوبارہ کھلیں گے۔
نوٹیفکیشن کا اطلاق مری اور کوٹلی ستیاں میں قائم تمام سرکاری و نجی اسکولوں اور کالجز پر ہوگا۔ حکام کے مطابق یہ فیصلہ پہاڑی علاقوں میں سخت موسم کے دوران طلبہ، اساتذہ اور عملے کی حفاظت کو یقینی بنانے کے لیے کیا گیا ہے۔
ضلعی انتظامیہ نے تعلیمی اداروں کے سربراہان کو ہدایت کی ہے کہ سرمائی تعطیلات کے آغاز سے قبل مڈٹرم امتحانات مکمل کیے جائیں۔ اس کے علاوہ اداروں کو تعطیلات سے قبل امتحانی نتائج کا اعلان کرنے کی بھی ہدایت دی گئی ہے۔
حکام کا کہنا ہے کہ طویل تعطیلات کا مقصد شدید سردی اور برف باری کے باعث پیدا ہونے والے ممکنہ خطرات سے بچاؤ کو یقینی بنانا ہے۔
