آسٹریلیا کے شہر سڈنی کے ساحلی علاقے میں جاری ایک تقریب کے دوران فائرنگ کے واقعے کے بعد کرکٹ آسٹریلیا نے غیر معمولی صورتحال کے پیشِ نظر قوانین میں نرمی کر دی۔
بگ بیش لیگ کی ٹیم سڈنی سکسرز کے کھلاڑیوں کو واقعے کے فوراً بعد موبائل فون فراہم کیے گئے تاکہ وہ اپنے اہلِ خانہ اور قریبی رشتہ داروں کی خیریت معلوم کر سکیں۔ فائرنگ کے وقت سڈنی سکسرز کے کھلاڑی وارم اپ میں مصروف تھے۔
معمول کے مطابق اینٹی کرپشن کوڈ کے تحت میچ سے قبل یا دورانِ میچ کھلاڑیوں اور اسپورٹس اسٹاف کے لیے موبائل فون کا استعمال ممنوع ہوتا ہے اور فون جمع کرا لیے جاتے ہیں، تاہم اس ہنگامی صورتحال میں اس قانون پر عارضی طور پر نرمی کی گئی۔
واضح رہے کہ سڈنی سکسرز کو بگ بیش لیگ کے اپنے پہلے میچ میں پرتھ میں پرتھ اسکارچرز کا سامنا تھا۔
