انٹرنیشنل کرکٹ کونسل (آئی سی سی) نے منگل کے روز مینز ٹی ٹوئنٹی ورلڈ کپ 2026 کی ٹرافی ٹور کا باضابطہ آغاز بھارت اور سری لنکا کو ملانے والے تاریخی مقام آدمز برج سے کر دیا۔ اس علامتی مقام کو بھارت میں رام سیتو کے نام سے بھی جانا جاتا ہے، جو دونوں میزبان ممالک کے درمیان ثقافتی اور جغرافیائی رابطے کی نمائندگی کرتا ہے۔
ٹرافی کی لانچنگ ایک منفرد اور دلکش انداز میں کی گئی، جہاں دو نشستوں والے پیرا موٹر کے ذریعے چمچماتی ٹرافی کو بھارت کے جنوبی ساحل کے خوبصورت پس منظر میں فضا میں بلند کیا گیا، جس نے شائقین کرکٹ کی توجہ اپنی جانب مبذول کر لی۔
آئی سی سی کے مطابق، آدمز برج نہ صرف مذہبی اور ثقافتی اہمیت رکھتا ہے بلکہ بھارت اور سری لنکا کے درمیان ورلڈ کپ کے مشترکہ انعقاد کی علامت بھی ہے۔ ٹرافی ٹور کے دوران ورلڈ کپ کی چاندی کی ٹرافی ایشیا کے مختلف ممالک کا دورہ کرے گی، جن میں بھارت، سری لنکا، قطر، عمان، نیپال، بحرین اور منگولیا شامل ہیں۔
اس ٹور کا مقصد شائقین کرکٹ کو عالمی ایونٹ کے قریب لانا ہے، جہاں مختلف ممالک میں تعلیمی اداروں کے دورے، فین میٹس، عوامی سرگرمیاں اور کرکٹ کارنیولز کا انعقاد کیا جائے گا، تاکہ ورلڈ کپ 2026 کا جوش و خروش پورے خطے میں پھیلایا جا سکے
