پاکستانی کرکٹر عماد وسیم نے تصدیق کر دی ہے کہ ان کی اور اہلیہ ثانیہ اشفاق کی راہیں الگ ہو چکی ہیں، جس کے بعد ان کی نجی زندگی سے متعلق گردش کرنے والی افواہوں کا خاتمہ ہو گیا ہے۔
عماد وسیم نے مختصر بیان میں علیحدگی کی تصدیق کرتے ہوئے کہا کہ یہ فیصلہ باہمی رضامندی سے اور سوچ بچھار کے بعد کیا گیا۔ انہوں نے ثانیہ اشفاق کے لیے احترام کا اظہار کیا اور میڈیا و عوام سے اپیل کی کہ ان کی ذاتی زندگی کو قیاس آرائیوں کا نشانہ نہ بنایا جائے۔
واضح رہے کہ عماد وسیم اور ثانیہ اشفاق کی شادی 2019 میں ہوئی تھی اور دونوں نے ہمیشہ اپنی نجی زندگی کو عوامی توجہ سے دور رکھا۔ تاہم حالیہ عرصے میں سوشل میڈیا پر ایک ساتھ تصاویر اور پوسٹس غائب ہونے کے بعد علیحدگی کی خبریں سامنے آنے لگی تھیں۔
ذرائع کے مطابق دونوں فریق اس مرحلے پر خاموشی اور وقار کو ترجیح دے رہے ہیں۔ دوسری جانب مداحوں کی جانب سے سوشل میڈیا پر مختلف ردِعمل دیکھنے میں آ رہا ہے، جہاں کئی افراد نے اس مشکل وقت میں دونوں کے لیے نیک تمناؤں کا اظہار کیا ہے۔
