کراچی کے علاقے سہراب گوٹھ میں واقع ایک گھر سے افغان خاتون اور اس کے تین کمسن بچوں کی پھندا لگی لاشیں برآمد ہوئیں۔
ریسکیو حکام کے مطابق گنا منڈی کے علاقے میں واقع گھر سے چار لاشیں ملی ہیں جن میں ایک خاتون اور تین بچے شامل ہیں۔
پولیس کے مطابق بچوں کی عمریں 2 سے 8 سال کے درمیان ہیں، جبکہ چاروں لاشیں پھندا لگی ہوئی پائی گئیں۔ ابتدائی طور پر واقعہ خودکشی کا معلوم ہوتا ہے۔ جاں بحق ہونے والوں کی شناخت 30 سالہ فاطمہ، 10 سالہ سونم، 3 سالہ آرزو اور 2 سالہ ارمان کے نام سے ہوئی ہے۔
پولیس حکام کا کہنا ہے کہ خاتون کے شوہر کو حراست میں لے کر تفتیش شروع کر دی گئی ہے۔ شوہر کے ابتدائی بیان کے مطابق واقعہ گھریلو جھگڑے کے بعد پیش آیا۔
پولیس کے مطابق جاں بحق خاتون کا تعلق افغانستان سے تھا جبکہ شوہر نجیب اللہ کا تعلق ضلع لیہ سے ہے جو سبزی منڈی میں کام کرتا ہے اور اس نے افغان خاتون سے دوسری شادی کر رکھی تھی۔
دوسری جانب صوبائی وزیر داخلہ سندھ ضیا لنجار نے واقعے کا نوٹس لیتے ہوئے ایس ایس پی ایسٹ سے رپورٹ طلب کی۔ پولیس نے بتایا کہ واقعے کو ابتدائی طور پر خودکشی قرار دیا جا رہا ہے تاہم حتمی نتیجہ شواہد کے مکمل جائزے کے بعد سامنے آئے گا۔ وزیر داخلہ نے ہدایت کی کہ تفتیش کا عمل شفاف اور غیر جانبدار رکھا جائے۔
