میرپور خاص: ایک افسوسناک واقعے میں تھانے میں مدد کی غرض سے آنے والی خاتون کو مبینہ طور پر جنسی زیادتی کا نشانہ بنا دیا گیا۔
ضلع پولیس کے ترجمان کے مطابق متاثرہ خاتون نے ڈی آئی جی کو دی گئی درخواست میں مؤقف اختیار کیا کہ وہ اپنی بیٹی کی بازیابی کے لیے مہران پولیس اسٹیشن گئی تھی جہاں اسے مبینہ طور پر زیادتی کا سامنا کرنا پڑا۔
پولیس کے مطابق خاتون کی مدعیت میں مقدمہ درج کرلیا گیا ہے جبکہ ایس ایس پی میرپور خاص ڈاکٹر سمیر نور چنہ نے واقعے کا فوری نوٹس لیتے ہوئے ایس ایچ او میر خادم تالپور کو معطل کر کے انکوائری کا حکم دے دیا ہے۔
ترجمان کے مطابق خاتون اور ایس ایچ او دونوں کے میڈیکل نمونے تجزیے کے لیے جمع کرلیے گئے ہیں، تفصیلی رپورٹ آنے کے بعد مزید قانونی کارروائی عمل میں لائی جائے گی۔
