کراچی: ٹک ٹاک کا جنون ایک اور جان لے گیا، گلستانِ جوہر کے علاقے پہلوان گوٹھ میں ویڈیو بناتے ہوئے گولی چلنے سے نوبیاہتا خاتون جاں بحق ہوگئی۔
تفصیلات کے مطابق 22 سالہ فرزانہ جمعہ کے روز فائرنگ سے شدید زخمی ہوئی تھی اور ہفتے کو جناح اسپتال میں دورانِ علاج دم توڑ گئی۔ پولیس کارروائی کے بعد لاش کو چھیپا سردخانے منتقل کردیا گیا۔
ایس ایچ او گلستانِ جوہر انسپکٹر کاشف ربانی کے مطابق مقتولہ کے شوہر غلام مصطفیٰ کو گرفتار کرلیا گیا ہے، ملزم کے قبضے سے 9 ایم ایم پستول برآمد ہوا جو بغیر لائسنس کے تھا اور کشمور سے خریدا گیا تھا۔
پولیس کے مطابق فرزانہ اور غلام مصطفیٰ کا نکاح رواں سال ستمبر میں ہوا تھا جبکہ رخصتی ابھی باقی تھی۔ فرزانہ ٹک ٹاک ویڈیوز بناتی تھی اور واقعے کے روز بھی شوہر کے ساتھ ویڈیو بنا رہی تھی۔
تحقیقات کے مطابق شوہر کے ہاتھ میں پستول تھا، فرزانہ نے دریافت کیا کہ “اس میں گولی تو نہیں؟” جس پر شوہر نے کہا “نہیں۔” اس کے بعد فرزانہ نے پستول کی نالی اپنی کنپٹی پر رکھتے ہوئے کہا “اب ٹریگر دباؤ” — جیسے ہی ٹریگر دبایا گیا، گولی چل گئی اور وہ موقع پر ہی زخمی ہوگئی۔
پولیس نے بتایا کہ مقتولہ کی والدہ کو اطلاع دے دی گئی ہے اور وہ کندھ کوٹ سے کراچی روانہ ہوچکی ہیں۔ والدہ کے پہنچنے کے بعد واقعے کا مقدمہ درج کیا جائے گا۔
