لاہور – امیر بالاج قتل کیس میں اہم پیش رفت سامنے آئی ہے، سیشن کورٹ لاہور نے عقیل عرف گوگی بٹ کی عبوری ضمانت عدم پیروی کی بنیاد پر منسوخ کر دی۔ مقدمہ تھانہ چوہنگ پولیس میں درج ہے۔ عدالت نے گوگی بٹ کی آج تک عبوری ضمانت منظور کر رکھی تھی تاہم وہ عدالت کے روبرو پیش نہ ہوا، جس پر عدالت نے ضمانت خارج کر دی۔
یاد رہے کہ دو روز قبل کیس کے مرکزی ملزم خواجہ تعریف گلشن عرف طیفی بٹ کو رحیم یار خان میں مبینہ پولیس مقابلے کے دوران ہلاک کر دیا گیا تھا۔ ذرائع کے مطابق طیفی بٹ کو لاہور منتقل کیا جا رہا تھا جب کہ اس کے ساتھیوں نے تھانہ کوٹ سبزل صادق آباد کے قریب اسے چھڑوانے کی کوشش کی۔ پولیس کے مطابق فائرنگ کے تبادلے کے دوران طیفی بٹ اپنے ہی ساتھیوں کی گولی سے ہلاک ہوا۔
