کراچی: علیگڑھ انسٹیٹیوٹ آف ٹیکنالوجی (AIT) کراچی میں شعبۂ الیکٹرانکس کے زیرِ اہتمام دو روزہ تکنیکی ایونٹ الیکٹرو مینیا 2026 کامیابی سے منعقد ہوا، جس میں طلبہ نے اپنی ذہانت، تخلیقی سوچ اور عملی تکنیکی مہارتوں کا شاندار مظاہرہ کیا۔
یہ ایونٹ شعبۂ الیکٹرانکس کے سربراہ ثاقب نور کی نگرانی میں منعقد کیا گیا، جبکہ انجینئر سدرہ عزیز اور انجینئر حفصہ اسرار نے ایونٹ کی کوآرڈینیشن کے فرائض انجام دیے۔ تقریب کا مقصد طلبہ میں الیکٹرانکس کے عملی تصورات کو مضبوط بنانا، تخلیقی صلاحیتوں کو فروغ دینا اور پیشہ ورانہ مہارتوں میں اضافہ کرنا تھا۔ بڑی تعداد میں طلبہ نے بھرپور جوش و خروش کے ساتھ شرکت کی۔
ایونٹ کے پہلے دن “اسپیک ٹو امپیکٹ” کے عنوان سے ایک معلوماتی سیمینار منعقد ہوا، جس میں طلبہ کو مؤثر گفتگو اور پریزنٹیشن اسکلز کی تربیت دی گئی۔ بعد ازاں “سورٹ-او-ٹرونکس” اور “الیکٹرو ڈارٹ” جیسی سرگرمیوں کے ذریعے الیکٹرانکس کے بنیادی تصورات کو عملی اور دلچسپ انداز میں سمجھایا گیا۔
دوسرے دن “کوئزٹرونک” کے تحت تکنیکی کوئز مقابلہ منعقد کیا گیا، جس سے طلبہ کی تجزیاتی اور علمی صلاحیتوں میں اضافہ ہوا، جبکہ “برین ٹو بورڈ” سرگرمی میں طلبہ نے سرکٹ ڈیزائننگ کے ذریعے اپنے تخلیقی اور فنی آئیڈیاز کو عملی شکل دی۔
اس موقع پر خطاب کرتے ہوئے پرنسپل علیگڑھ انسٹیٹیوٹ شاہد جمیل نے کہا کہ اس نوعیت کے تکنیکی ایونٹس طلبہ کو عملی زندگی کے چیلنجز کے لیے تیار کرنے میں اہم کردار ادا کرتے ہیں۔ کنوینر سید محمد محسن کاظم نے کہا کہ الیکٹرو مینیا ٹیم ورک، اعتماد سازی اور مسئلہ حل کرنے کی صلاحیتوں کو فروغ دینے کا مؤثر ذریعہ ثابت ہوا۔
سربراہ شعبۂ الیکٹرانکس ثاقب نور نے کہا کہ ایونٹ کا مقصد طلبہ کو آسان اور مؤثر انداز میں الیکٹرانکس کی اہمیت اور روزمرہ زندگی میں اس کے عملی استعمال سے آگاہ کرنا ہے۔
الیکٹرو مینیا 2026 علیگڑھ انسٹیٹیوٹ آف ٹیکنالوجی کی تعلیمی اور تکنیکی سرگرمیوں میں ایک کامیاب اور یادگار اضافہ ثابت ہوا۔
