ایک حالیہ تحقیق میں یہ بات سامنے آئی ہے کہ ایک بہت آسان عادت کو اپنا کر کوئی بھی شخص کینسر کی کم از کم 13 مختلف اقسام سے متاثر ہونے کا خطرہ نمایاں حد تک کم کر سکتا ہے۔
عام مشاہدے کی بات ہے کہ کینسر کو ایک ایسے خطرناک اور سنگین مرض کے طور پر دیکھا جاتا ہے جو نہ صرف جان لیوا ہے بلکہ اس مرض میں مبتلا ہونے کی وجوہات بھی بے شمار ہیں، تاہم برٹش جرنل آف سپورٹس میڈیسن میں شائع ایک تحقیق میں بتایا گیا کہ روزانہ چہل قدمی کی عادت کینسر کی 13 مختلف اقسام سے متاثر ہونے کا خطرہ کم کر دیتی ہے۔
اس تحقیق میں 85 ہزار افراد کے ڈیٹا کی جانچ پڑتال کی گئی، ان افراد کو کلائی میں ایک ہفتے تک ٹریکرز پہنائے گئے اور ان کی جسمانی سرگرمیوں کا ڈیٹا اکٹھا کیا گیا، اس کے بعد ان افراد کی صحت کا اوسطاً 6 سال تک جائزہ لیا گیا، اس عرصے میں 2600 سے زائد افراد میں کینسر کی 13 مختلف اقسام میں سے کسی ایک کی تشخیص ہوئی۔
تحقیق میں دریافت ہوا کہ ہر قسم کی جسمانی سرگرمی جیسے سست رفتاری سے چہل قدمی سے ہی کینسر کی 13 اقسام سے متاثر ہونے کا خطرہ نمایاں حد تک کم ہو جاتا ہے، جو فرد جسمانی طور پر زیادہ متحرک ہوتا ہے، اس کیلئے یہ خطرہ اتنا زیادہ کم ہو جاتا ہے۔
تحقیق میں بتایا گیا کہ روزانہ 5 ہزار یا اس سے زائد قدم چلنے سے کینسر کا خطرہ کم ہونے لگتا ہے، جبکہ روزانہ 7 ہزار قدم چلنے سے کینسر سے متاثر ہونے کا خطرہ 5 ہزار قدم چلنے والے افراد کے مقابلے میں مزید 11 فیصد تک گھٹ جاتا ہے، اسی طرح 9 ہزار قدم روزانہ چلنے سے یہ خطرہ 16 فیصد تک کم ہو جاتا ہے۔
محققن کے مطابق آپ جتنا زیادہ خود کو متحرک رکھیں گے، کینسر سے خود کو بچانے میں اتنے زیادہ کامیاب رہیں گے، ہلکی پھلکی جسمانی سرگرمیوں سے ہی آپ کینسر جیسے مرض کا خطرہ کم کرسکتے ہیں، بس خود کو متحرک رکھنا اہم ہے۔
