کراچی: علیگڑھ انسٹیٹیوٹ آف ٹیکنالوجی میں طلبہ کے لیے ’’سائبر سیکیورٹی آگاہی‘‘ کے دوسرے بوٹ کیمپ کا کامیاب انعقاد کیا گیا، جس کا مقصد جدید ڈیجیٹل خطرات سے نمٹنے کے لیے عملی اور نظریاتی تربیت فراہم کرنا تھا۔
بوٹ کیمپ میں معروف سائبر سیکیورٹی ماہر سید محمد اسد نے بطور ٹرینر شرکت کی اور طلبہ کو سائبر حملوں، ڈیٹا چوری، فِشنگ، رینسم ویئر، اسپائی ویئر اور دیگر خطرات کے بارے میں تفصیل سے آگاہ کیا۔ انہوں نے مضبوط پاس ورڈز، محفوظ براؤزنگ اور مشکوک لنکس سے بچنے کی اہمیت پر زور دیا، جبکہ آن لائن فراڈ سے بچاؤ کے عملی طریقے بھی سکھائے۔
پروگرام کے دوران عملی سرگرمیوں کے ذریعے طلبہ کو مختلف سائبر سیکیورٹی ٹولز کے استعمال کی تربیت دی گئی تاکہ وہ ایک محفوظ ڈیجیٹل ماحول تشکیل دے سکیں اور حقیقی خطرات کا مؤثر انداز میں مقابلہ کر سکیں۔
اس موقع پر پرنسپل شاہد جمیل نے کہا کہ اس طرح کے تربیتی پروگرام طلبہ کو جدید ٹیکنالوجی کے چیلنجز سے نمٹنے کے قابل بناتے ہیں۔ کنوینر سید محمد محسن کاظم کے مطابق اس بوٹ کیمپ کا مقصد طلبہ میں سائبر سیکیورٹی سے متعلق شعور اور عملی مہارت پیدا کرنا ہے۔
سربراہ شعبہ سافٹ ویئر مس تسنیم آرزو اور سربراہ شعبہ سی آئی ٹی محمد ساجد نے بھی اس بات پر زور دیا کہ موجودہ دور میں سائبر سیکیورٹی کی تعلیم ہر طالب علم کے لیے ضروری ہے اور ایسے پروگرام آئندہ بھی جاری رہیں گے۔
بوٹ کیمپ میں طلبہ و طالبات نے بھرپور شرکت کی، سوالات کیے اور عملی سرگرمیوں میں دلچسپی کا مظاہرہ کیا۔ اختتام پر مہمانانِ گرامی کو شیلڈ اور تعریفی اسناد پیش کی گئیں۔
