جرمنی جانے کے خواہش مند پاکستانی شہریوں کے لیے 2026 میں ویزا درخواست کا عمل بدستور جرمن مشن کے سرکاری نظام کے تحت جاری ہے، جہاں شینگن ویزا کے لیے درخواست دہندگان کو پہلے آن لائن اپائنٹمنٹ ویٹنگ لسٹ میں رجسٹر کرنا ہوتا ہے، جبکہ طویل المدتی نیشنل ویزا کے لیے الگ کیٹیگریز کے تحت درخواست دی جاتی ہے۔ جرمن فارن آفس کے اپائنٹمنٹ سسٹم کے مطابق اسلام آباد میں شینگن ویزا درخواستوں کے لیے رجسٹریشن آن لائن کی جاتی ہے اور اپائنٹمنٹ بعد میں الاٹ ہوتی ہے۔
یورپی کمیشن کے مطابق شینگن ویزا مختصر قیام کے لیے جاری کیا جاتا ہے، جس کے تحت مسافر 180 دن میں زیادہ سے زیادہ 90 دن تک شینگن علاقے میں رہ سکتا ہے۔ یہ ویزا سیاحت، کاروبار یا مختصر خاندانی دوروں کے لیے استعمال ہوتا ہے۔
سرکاری معلومات کے مطابق پاکستانی درخواست دہندگان کو درخواست جمع کراتے وقت مکمل فارم، پاسپورٹ، تصاویر، مطلوبہ معاون دستاویزات اور بعض صورتوں میں بائیومیٹرکس فراہم کرنا ہوتے ہیں۔ جرمن مشن پاکستان کی دستاویزاتی ہدایات میں یہ بھی کہا گیا ہے کہ اصل دستاویزات ساتھ لانا ضروری ہے، تمام نقول DIN A4 سائز میں، واضح اور اسٹیپل کے بغیر ہونی چاہییں۔
شینگن ویزا فیس یورپی کمیشن کے مطابق جون 2024 سے بڑھا دی گئی تھی، جس کے بعد بالغ درخواست دہندگان کے لیے فیس 90 یورو ہو گئی۔ دوسری جانب جرمنی کے مختلف نیشنل ویزا زمروں، جیسے جاب سیکر، اپرچونٹی کارڈ یا ورک ویزا، کے لیے جرمن مشن پاکستان کے حالیہ چیک لسٹس میں 75 یورو فیس درج ہے، جو پاکستانی روپے میں وصول کی جاتی ہے۔
جرمنی میں ملازمت، تعلیم یا طویل قیام کے خواہش مند پاکستانیوں کے لیے وفاقی جرمن پورٹل Make-it-in-Germany پر ویزا اقسام، درخواست فارم اور اسکلڈ ورکر امیگریشن قوانین سے متعلق تازہ معلومات دستیاب ہیں۔ اسی پورٹل کے مطابق مختلف مقاصد کے لیے الگ فارم اور شرائط لاگو ہوتی ہیں، اس لیے درخواست گزاروں کو اپنی ویزا کیٹیگری درست طور پر منتخب کرنا ضروری ہے۔
حکام کے مطابق غلط یا نامکمل معلومات دینے کی صورت میں ویزا درخواست مسترد کی جا سکتی ہے۔ جرمن مشن کی ہدایات میں واضح کیا گیا ہے کہ درخواست دہندہ تمام معلومات درست اور مکمل فراہم کرنے کا پابند ہے، بصورت دیگر درخواست رد ہو سکتی ہے۔
