ممبئی: بالی ووڈ کے معروف اداکار Aamir Khan رواں سال تیسری شادی کرنے جا رہے ہیں۔ ذرائع کے مطابق عامر خان اپنی دیرینہ ساتھی گوری سپراٹ کے ساتھ 5 جولائی کو ایک سادہ اور نجی تقریب میں رشتہ ازدواج میں منسلک ہوں گے۔
رپورٹس کے مطابق تقریب عامر خان کی رہائش گاہ پر منعقد ہوگی، جس میں دونوں خاندانوں کے قریبی افراد شریک ہوں گے۔ شادی کو نجی رکھنے کا فیصلہ کیا گیا ہے اور کسی بڑے عوامی جشن کا منصوبہ نہیں بنایا گیا۔
عامر خان اور گوری سپراٹ نے 2024 کے آغاز میں ایک دوسرے کو ڈیٹ کرنا شروع کیا تھا۔ دونوں کی ملاقات بنگلورو میں عامر کی کزن نزہت خان کے ذریعے ہوئی تھی۔ بعد ازاں عامر خان نے 2025 میں اپنی 60ویں سالگرہ کے موقع پر گوری کو میڈیا کے سامنے اپنی "پارٹنر” کے طور پر متعارف کرایا تھا۔
گوری سپراٹ پہلے بنگلورو میں ایک سیلون چین کے ساتھ منسلک تھیں، جبکہ اب وہ عامر خان پروڈکشنز میں کام کر رہی ہیں۔ ذرائع کے مطابق دونوں گزشتہ ایک سال سے زائد عرصے سے ساتھ رہ رہے ہیں۔
اگرچہ عامر خان نے اپنی اور گوری کی دوستی کو عوامی سطح پر حال ہی میں تسلیم کیا، تاہم دونوں ایک دوسرے کو تقریباً 25 برس سے جانتے ہیں۔ وقت کے ساتھ یہ دوستی محبت میں تبدیل ہوئی اور اب دونوں نے اپنی زندگی ایک ساتھ گزارنے کا فیصلہ کیا ہے۔
گوری سپراٹ ایک بیٹے کوئن کی والدہ بھی ہیں، جو ان کی سابقہ شادی سے ہیں۔ ان کا تعلق ایک ممتاز خاندان سے ہے۔ ان کے دادا فلپ سپراٹ برطانوی نژاد کمیونسٹ رہنما تھے جو 1920 کی دہائی میں ہندوستان آئے اور بعد ازاں برصغیر کی آزادی کی تحریک میں بھی شریک رہے۔
ایک حالیہ انٹرویو میں عامر خان نے گوری کے ساتھ اپنے تعلقات کے بارے میں بات کرتے ہوئے کہا تھا کہ دونوں ایک دوسرے کے لیے سنجیدہ ہیں اور مضبوط رشتے میں بندھے ہوئے ہیں۔ ان کے مطابق دل سے وہ خود کو پہلے ہی گوری کا شریکِ حیات سمجھتے ہیں۔
عامر خان کی پہلی شادی 1986 میں رینا دتہ سے ہوئی تھی، جن سے ان کے دو بچے، آئرہ خان اور جنید خان ہیں۔ دونوں نے 2002 میں علیحدگی اختیار کر لی تھی۔
بعد ازاں عامر خان نے 2005 میں فلم ساز کرن راؤ سے شادی کی۔ ان کے ہاں سروگیسی کے ذریعے بیٹے آزاد راؤ خان کی پیدائش ہوئی۔ یہ شادی 2021 میں اختتام پذیر ہوئی۔
اگرچہ عامر خان کی دونوں سابقہ شادیاں طلاق پر ختم ہوئیں، تاہم وہ رینا دتہ اور کرن راؤ کے ساتھ خوشگوار تعلقات برقرار رکھے ہوئے ہیں۔ تینوں کو اکثر خاندانی تقریبات، تہواروں اور دیگر اہم مواقع پر ایک ساتھ دیکھا جاتا ہے۔
ذرائع کے مطابق اگر شیڈول نے اجازت دی تو بالی ووڈ سپر اسٹارز سلمان خان اور شاہ رخ خان بھی شادی کی تقریب میں شرکت کر سکتے ہیں
