سیول — دنیا کے مقبول ترین کورین پاپ گروپ ‘بی ٹی ایس’ کے رکن ‘وی’، جن کا اصل نام کِم تائے ہیونگ ہے، نے سوشل میڈیا پلیٹ فارم ‘ویورس’ پر اپنے جنوبی ایشیائی مداحوں ‘آرمی’ کے ساتھ خصوصی گفتگو کر کے پورے برِصغیر کے سوشل میڈیا پر دھوم مچا دی ہے۔ ورچوئل چیٹ کے دوران عالمی اسٹار نے پاکستان، بھارت اور بنگلہ دیش کی سیر کرنے، وہاں کی ثقافت، سیاحتی مقامات اور روایتی کھانوں کا چکھنے کی شدید خواہش کا اظہار کیا۔ جب ایک ہندوستانی مداح نے ان سے پوچھا کہ بی ٹی ایس بھارت کب آئے گا، تو انہوں نے سیدھا جواب دیا، "میں بھارت جانا چاہتا ہوں”، جس کے بعد انٹرنیٹ پر خوشی کا طوفان آ گیا۔
کورین پاپ اسٹار نے گفتگو کے دوران خطے کی ثقافت سے اپنی گہری دلچسپی کا مظاہرہ کرتے ہوئے پاکستانی مداحوں کے دل بھی جیت لیے۔ ایک صارف کی جانب سے پاکستان آنے کی دعوت پر ‘وی’ نے شرارتی انداز میں سوال کیا، "اگر میں پاکستان آؤں، تو کیا آپ میرے لیے بریانی اور کڑاہی بنائیں گے؟” دوسری جانب، بنگلہ دیشی مداح کے ایک جذباتی سوال کا جواب دیتے ہوئے انہوں نے انکشاف کیا کہ انہوں نے انٹرنیٹ پر بنگلہ دیش کے بارے میں سرچ کیا ہے اور وہ وہاں کے مشہور ‘کاکس بازار بیچ’ (دنیا کا طویل ترین قدرتی ساحل) اور تاریخی ‘پنک پیلس میوزیم’ (احسن منزل) کو دیکھنے کے خواہش مند ہیں۔ اگرچہ بی ٹی ایس یا ان کی انتظامیہ کی جانب سے تاحال اپنے موجودہ ‘اری رانگ ورلڈ ٹور’ میں برِصغیر کے کسی شہر کو شامل کرنے کا باقاعدہ اعلان نہیں کیا گیا، لیکن کِم تائے ہیونگ کے اس برائے راست جواب نے کروڑوں مداحوں میں یہ امیدیں جگا دی ہیں کہ مستقبل قریب میں یہ نامور گروپ خطے کا دورہ کر سکتا ہے
