گلوکار کا کہنا ہے کہ ان کے خاندان نے کبھی اس معاملے پر ان پر دباؤ نہیں ڈالا اور وہ اپنی ازدواجی زندگی کو اسی طرح قبول کرتے ہیں۔
جواد احمد نے اپنی ازدواجی زندگی اور دوسری شادی سے متعلق خیالات کا اظہار کرتے ہوئے بتایا کہ وہ کئی برس سے شادی شدہ ہیں، تاہم ان کے ہاں اولاد نہیں ہے۔ ان کے مطابق ان کے گھرانے کا ماحول ترقی پسند رہا ہے، اسی لیے والدین اور خاندان کی جانب سے انہیں اولاد نہ ہونے پر کسی دباؤ کا سامنا نہیں کرنا پڑا۔
دوسری شادی کے موضوع پر گفتگو کرتے ہوئے گلوکار نے کہا کہ بعض مرد پہلی شادی سے اولاد نہ ہونے کی صورت میں بچوں کی خواہش کے تحت دوسری شادی کرلیتے ہیں، تاہم ان کے نزدیک ایک سے زیادہ ازدواجی رشتوں میں انصاف کرنا انتہائی مشکل ہے۔
جواد احمد کا مؤقف ہے کہ اگرچہ مردوں کو ایک سے زائد شادیاں کرنے کی اجازت دی گئی ہے، لیکن دونوں خواتین کے درمیان مکمل انصاف اور برابری قائم رکھنا آسان نہیں۔ اسی لیے وہ ایک ہی ازدواجی رشتے پر توجہ دینے اور اسے نبھانے کو ترجیح دیتے ہیں۔
واضح رہے کہ جواد احمد پاکستانی موسیقی کا معروف نام ہیں۔ ان کے مقبول گانوں میں ’دوستی‘ اور ’او کہندی اے سیاں میں تیری آں‘ شامل ہیں۔ موسیقی کے علاوہ وہ سیاست میں بھی سرگرم رہے ہیں۔ ان کی حالیہ گفتگو میں اولاد، خاندانی دباؤ اور ازدواجی زندگی سے متعلق ان کا ذاتی نقطۂ نظر سامنے آیا ہے۔
