معروف گلوکار اور اداکار فرحان سعید نے سیبل سہیل کی تاریخی کامیابی پر خوشی کا اظہار کیا، جنہوں نے دوحہ، قطر میں منعقدہ ایشین ویٹ لفٹنگ ماسٹرز چیمپیئن شپ میں گولڈ میڈل جیت کر پاکستان کی پہلی خاتون ویٹ لفٹر ہونے کا اعزاز حاصل کیا۔
فرحان سعید نے انسٹاگرام اسٹوری پر سیبل سہیل کو ٹیگ کرتے ہوئے لکھا:
"فخر کا لمحہ، مبارک ہو 🇵🇰”
یہ مختصر مگر پُراثر پیغام پورے ملک کی خوشی اور فخر کو ظاہر کرتا ہے۔
31 سالہ سیبل سہیل نے 59 کلوگرام کیٹگری میں حصہ لیتے ہوئے 95 کلوگرام (40 کلوگرام اسنیچ اور 55 کلوگرام کلین اینڈ جرک) وزن اٹھا کر سونے کا تمغہ اپنے نام کیا۔
یہ ان کا پہلا بین الاقوامی ویٹ لفٹنگ مقابلہ تھا، اور اس کامیابی نے نہ صرف ان کے کیریئر میں ایک نیا سنگِ میل قائم کیا بلکہ پاکستانی خواتین کے لیے پاور اسپورٹس میں ایک نئی راہ بھی ہموار کی۔
سابقہ کامن ویلتھ اور ایشین پاور لفٹنگ چیمپیئن سیبل سہیل نے ویٹ لفٹنگ کا آغاز پاکستان کا پرچم عالمی سطح پر بلند کرنے کے عزم کے ساتھ کیا تھا۔
انہوں نے کہا:
"میری کوشش ہے کہ اپنے ملک اور خاندان کا نام روشن کروں۔ ہم نے اس کھیل کے لیے بہت قربانیاں دی ہیں، اور مجھے اس بات کو یقینی بنانا ہے کہ یہ سب محنت رائیگاں نہ جائے۔”
فرحان سعید اس سے پہلے بھی پاکستانی کھلاڑیوں کی کامیابیوں کو سراہ چکے ہیں۔ ایشین ایتھلیٹکس چیمپیئن شپ میں ارشد ندیم کی گولڈ میڈل جیت پر بھی انہوں نے انسٹاگرام کے ذریعے مبارکباد دی تھی۔
