وفاقی وزیر صحت اور متحدہ قومی موومنٹ (ایم کیو ایم) پاکستان کے سینئر رہنما مصطفیٰ کمال نے قطر کے وزیر صحت منصور بن ابراہیم المحمود سے دوحہ میں ملاقات کی۔ ملاقات میں انہوں نے قطر کو پاکستان میں ادویات، ویکسین اور میڈیکل آلات کی تیاری کے شعبے میں سرمایہ کاری کی دعوت دی۔
ایم کیو ایم کے ترجمان کے مطابق پاکستانی وفد میں سرجن جنرل ڈاکٹر ارشد نسیم اور قطر میں پاکستانی سفارت کار محمد عامر بھی شامل تھے۔ ملاقات کے دوران مصطفیٰ کمال نے قطر میں مقیم پاکستانی سرجنز کو کیٹیگری 3 سے کیٹیگری 1 میں ترقی دینے کی درخواست کی، جس پر قطری وزیر صحت نے جلد اس منتقلی کی یقین دہانی کروائی۔
ترجمان کے مطابق اس تبدیلی کے بعد پاکستانی سرجنز کو قطر میں ملازمت کے لیے کسی اضافی امتحان کی ضرورت نہیں ہوگی، جس سے نہ صرف ان کا دیرینہ مسئلہ حل ہوگا بلکہ کالج آف فزیشن اینڈ سرجنز پاکستان کا مطالبہ بھی پورا ہو جائے گا۔ اس پیش رفت سے بڑی تعداد میں پاکستانی سرجنز قطر میں خدمات انجام دے سکیں گے اور ملک کے لیے زرمبادلہ میں بھی اضافہ ممکن ہوگا۔
مزید برآں، مصطفیٰ کمال نے قطری ہم منصب کو وزیراعظم شہباز شریف کا خیرسگالی اور تعاون پر مبنی پیغام بھی پہنچایا۔
