سوشل میڈیا پر ایک وائرل پوسٹ نے سنسنی پھیلا دی ہے جس میں دعویٰ کیا گیا کہ مشہور اینی میٹڈ سیریز سمپسنز نے ایک پاکستانی کرکٹر کی کار حادثے میں موت کی پیشگوئی کی تھی۔ اس جھوٹے دعوے کے ساتھ ایک ایڈٹ شدہ اسکرین شاٹ بھی شامل تھا، جس نے مداحوں کو تشویش میں مبتلا کر دیا۔
پوسٹ میں کسی کھلاڑی کا نام واضح نہیں کیا گیا، مگر کمنٹس سیکشن میں صارفین نے محمد رضوان، شاداب خان اور بابر اعظم کے ناموں کا ذکر کیا۔ تاہم تحقیق سے یہ بات سامنے آئی ہے کہ سمپسنز کی 35 سیزنز اور 750 سے زائد اقساط میں ایسی کوئی پیشگوئی نہیں کی گئی۔
میڈیا اینالسٹ ڈاکٹر عمران رضا کے مطابق یہ پوسٹ ایک جعلی اسکرین شاٹ پر مبنی ہے جو AI یا فوٹو ایڈیٹنگ ٹولز کی مدد سے تیار کیا گیا۔ اس کا مقصد سوشل میڈیا پر لائکس اور وائرلٹی حاصل کرنا ہے۔
پہلے بھی کئی مرتبہ سمپسنز کی نام نہاد پیشگوئیاں جھوٹی ثابت ہو چکی ہیں، جیسا کہ کورونا وائرس کی "پیشگوئی” 2020 میں وائرل ہوئی تھی۔
اس خبر کے حوالے سے نہ تو کوئی معتبر عالمی میڈیا، سپورٹس ویب سائٹ اور نہ ہی سمپسنز کی ٹیم نے کسی پاکستانی کھلاڑی کی موت یا پیشگوئی کی تصدیق کی ہے۔ مداحوں کو تلقین کی جاتی ہے کہ افواہوں پر یقین نہ کریں اور حقائق کو پرکھ کر ہی رائے قائم کریں۔
