عالمی ادارہ صحت (ڈبلیو ایچ او) نے خبردار کیا ہے کہ چکن گونیا وائرس ایک بڑی عالمی وبا کی صورت اختیار کر سکتا ہے، اور اس کے تدارک کے لیے فوری اقدامات کی ضرورت ہے۔
ڈبلیو ایچ او کی ماہر ڈیانا روہاس الواریز کے مطابق چکن گونیا اب تک 119 ممالک میں رپورٹ ہو چکا ہے اور 5.6 ارب افراد کو اس سے خطرہ لاحق ہے۔ انہوں نے کہا کہ 2004-2005 میں یہ وائرس بحرِ ہند کے جزیروں سے پھیل کر دنیا بھر میں 5 لاکھ سے زائد افراد کو متاثر کر چکا ہے۔
ماہرین کا کہنا ہے کہ 2025 کے آغاز میں ری یونین، مایوٹ، اور ماریشس میں بڑی وبائیں سامنے آ چکی ہیں، اور ری یونین کی ایک تہائی آبادی متاثر ہونے کے خطرے میں ہے۔
چکن گونیا کی علامات ڈینگی اور زیکا وائرس جیسی ہوتی ہیں، جس سے تشخیص مشکل ہو جاتی ہے۔ وائرس افریقہ، جنوبی ایشیا اور یورپ میں بھی پھیل رہا ہے، اور فرانس میں مقامی منتقلی کی تصدیق جبکہ اٹلی میں مشتبہ کیسز سامنے آئے ہیں۔
ڈبلیو ایچ او نے دنیا بھر کی حکومتوں سے فوری اقدامات کرنے کی اپیل کی ہے تاکہ صورتحال پر قابو پایا جا سکے۔
