10 ستمبر 2025
ویب ڈیسک
اسلام آباد
وزیراعظم شہباز شریف نے کراچی سمیت سندھ کے مختلف علاقوں میں شدید بارشوں اور سیلابی صورتحال پر گہری تشویش کا اظہار کرتے ہوئے متاثرہ خاندانوں کی فوری امداد اور بحالی کے لیے ہنگامی اقدامات کرنے کی ہدایت دی ہے۔
وزیراعظم کی زیرِ صدارت ہونے والے اجلاس میں انہوں نے نیشنل ڈیزاسٹر مینجمنٹ اتھارٹی (این ڈی ایم اے) کو ہدایت دی کہ وہ صوبائی حکومت اور سندھ ڈیزاسٹر مینجمنٹ اتھارٹی (ایس ڈی ایم اے) کے ساتھ قریبی رابطہ رکھ کر امدادی کارروائیوں کو مزید تیز کرے۔
شہباز شریف نے کراچی میں جاری ریسکیو سرگرمیوں میں پاک فوج، رینجرز اور ریسکیو 1122 کی خدمات کو سراہا اور گڈاپ ندی میں شہریوں کے ڈوبنے کے واقعے پر گہرے دکھ کا اظہار کیا۔ انہوں نے متعلقہ اداروں کو ہدایت دی کہ سیلاب میں لاپتہ افراد کو فوری طور پر تلاش کرنے کے لیے تمام وسائل بروئے کار لائے جائیں۔
وزیراعظم نے کہا کہ عوام کو سیلابی خطرات اور حفاظتی تدابیر سے آگاہ کرنے کے لیے آگاہی مہم کو مزید مؤثر بنایا جائے تاکہ زیادہ سے زیادہ لوگ محفوظ رہ سکیں۔ اس کے ساتھ ساتھ انہوں نے متاثرہ علاقوں میں نظامِ مواصلات کی جلد از جلد بحالی کی بھی ہدایت کی۔
ان کا کہنا تھا کہ وفاقی اور صوبائی حکومتیں مل کر اس مشکل گھڑی میں عوام کے ساتھ کھڑی ہیں اور ہر ممکن امداد فراہم کی جائے گی۔
