راولپنڈی — مبینہ طور پر سسرالیوں کے تشدد اور زہر دینے کے بعد 18 سالہ نوبیاہتا دلہن ماہم جاں بحق ہو گئی، پولیس ذرائع نے بتایا۔
ایکسپریس نیوز کے مطابق واقعہ تھانہ رتہ امرال کی حدود میں پیش آیا۔ متوفیہ کے والد ندیم سردار نے شوہر یاسر اور سسرالیوں کے خلاف تشدد و قتل کا مقدمہ درج کروایا ہے۔
والد کے مطابق، ماہم اور یاسر کی شادی تین ماہ قبل دھوم دھام سے ہوئی تھی، مگر ایک ماہ کے اندر ہی یاسر اور اُس کے گھر والوں نے ماہم پر جسمانی تشدد شروع کر دیا۔ اُن کا کہنا ہے کہ یاسر کا کوئی مستقل روزگار نہیں، وہ بیٹی سے خرچے مانگتا رہتا تھا، اور انکار کرنے پر تشدد کا سلسلہ جاری رہتا تھا۔
میڈیکل رپورٹ میں یہ انکشاف بھی ہوا ہے کہ ماہم کو زہر دیا گیا تھا، علاوہ ازیں تشدد کی وجہ سے بھی زخم تھے۔ وفات کی صبح شدید تشدد کے بعد اس کی حالت بگڑ گئی، شوہر اسے ڈسٹرکٹ ہیڈ کوارٹر اسپتال پہنچا کر فرار ہوگیا۔
پولیس نے والد کی شکایت پر تشدد اور قتل کی دفعات کے تحت مقدمہ درج کر لیا ہے جبکہ تفتیش جاری ہے۔
