کراچی: مدینہ کالونی کے علاقے میں واقع ایک گھر سے 40 سالہ شخص کی گلا کٹی لاش ملی ہے۔ پولیس کے مطابق مذکورہ شخص کو تیز دھار آلے سے گلا کاٹ کر قتل کیا گیا۔
ایس ایچ او مدینہ کالونی افتخار تنولی کے مطابق پولیس کو اطلاع ملی کہ بلدیہ ٹاؤن ٹیپو سلطان روڈ عظیم آباد، گلیکسی گرامر اسکول کے قریب گھر میں ایک شخص مردہ حالت میں پڑا ہے۔ پولیس ٹیم نے موقع پر پہنچ کر لاش کو اپنی تحویل میں لیا اور ایدھی ایمبولینس کے ذریعے سول اسپتال ٹراما سینٹر منتقل کردیا۔
پولیس کے مطابق مقتول کی شناخت محمد یوسف ولد اللہ دتہ کے نام سے ہوئی۔ ابتدائی تفتیش میں معلوم ہوا کہ مقتول گھر میں اکیلا رہتا تھا اور اپنے رشتہ دار اسلم کے ساتھ سائٹ ایریا کی ایک نجی لوم فیکٹری میں ملازم تھا۔ دونوں کا تعلق پنجاب کے علاقے گوجرہ سے بتایا گیا ہے۔
پولیس کے مطابق اسلم جب صبح کام سے گھر واپس آیا تو اس نے یوسف کی گلا کٹی لاش دیکھی اور فوری طور پر پولیس کو اطلاع دی۔
افسران کا کہنا ہے کہ مقتول شادی شدہ تھا اور اس کی فیملی گوجرہ میں مقیم ہے۔ پولیس نے واقعہ کی اطلاع مقتول کے اہلخانہ کو دے دی ہے جبکہ قتل کے مختلف پہلوؤں پر تفتیش شروع کر دی گئی ہے۔ پولیس کا کہنا ہے کہ جلد ہی ملزمان کو گرفتار کرلیا جائے گا۔
