پاکستانی سینئر اداکارہ بشریٰ انصاری نے اپنی تازہ ویلاگ میں اداکارہ ہانیہ عامر کی پیشہ ورانہ صلاحیتوں کو سراہتے ہوئے بھارتی مداحوں کے منفی ردعمل پر شدید تنقید کی ہے۔
نجی ٹی وی ایکسپریس نیوز کے مطابق بشریٰ نے کہا کہ جب ہانیہ نے بھارتی پنجابی گلوکار دلجیت دوسانجھ کے ساتھ فلم ’سردار جی 3‘ کی تھی، تب کوئی مسئلہ نہیں تھا، لیکن اب فلم کی کامیابی کے بعد بھارتیوں کا رویہ تبدیل ہو گیا ہے۔ انہوں نے سوال کیا، "اب بچگانہ رویہ کیوں؟ کیا ایک نوجوان پاکستانی اداکارہ سے آپ کو خطرہ محسوس ہوا ہے؟”
بشریٰ نے پاکستانی اداکار فواد خان کے ساتھ ماضی کے تنازعات کو بھی یاد دلایا اور الزام لگایا کہ پہلگام واقعہ جان بوجھ کر کرایا گیا تھا، کیونکہ بھارتی وزیراعظم نریندر مودی نہیں چاہتے کہ دونوں ممالک کے درمیان امن ہو۔
انہوں نے بھارتی شاعر اور فلمساز جاوید اختر پر بھی تنقید کرتے ہوئے کہا کہ ایسی باتیں نہیں ہونی چاہئیں جو لیجنڈ گلوکارہ لتا منگیشکر کی بے عزتی کریں۔
بشریٰ انصاری کی کھری باتوں کو سوشل میڈیا پر خوب پذیرائی مل رہی ہے۔ دوسری طرف، ہانیہ عامر، جن کے پاکستان اور بھارت میں 18 ملین سے زائد انسٹاگرام فالوورز ہیں، بشریٰ انصاری کی تعریف کو اپنے کیریئر کے لیے انتہائی اہم قرار دے رہی ہیں۔
