پشاور: گورنر فیصل کریم کندی نے تمام سیاسی جماعتوں، ارکانِ پارلیمنٹ اور متعلقہ فریقوں پر زور دیا ہے کہ وہ نیشنل فنانس کمیشن (این ایف سی) ایوارڈ کے تحت خیبرپختونخوا کا جائز اور آئینی حصہ حاصل کرنے کے لیے مشترکہ کوششیں کریں۔
ایک تقریب سے خطاب کرتے ہوئے گورنر کندی نے کہا کہ خیبرپختونخوا کو دہشت گردی، امن و امان کے مسائل اور کئی دہائیوں سے افغان مہاجرین کی میزبانی جیسے غیرمعمولی چیلنجز کا سامنا رہا ہے، جنہیں وسائل کی تقسیم میں ضرور مدنظر رکھا جانا چاہیے۔
انہوں نے کہا کہ این ایف سی ایوارڈ میں صوبے کا منصفانہ حصہ ملنے سے ترقیاتی منصوبوں، صحت، تعلیم، بنیادی ڈھانچے اور روزگار کے مواقع میں نمایاں بہتری لائی جا سکتی ہے۔
گورنر نے تمام سیاسی قوتوں سے اپیل کی کہ وہ سیاسی اختلافات سے بالاتر ہو کر صوبے کے مالی حقوق کے لیے متحد ہوں۔ ان کے مطابق وفاق اور صوبے کے درمیان مؤثر تعاون ہی خیبرپختونخوا کو درپیش معاشی مسائل کے حل اور پائیدار ترقی کی ضمانت بن سکتا ہے۔
انہوں نے اس امید کا اظہار بھی کیا کہ آئندہ این ایف سی ایوارڈ سے متعلق مشاورت میں خیبرپختونخوا کے جائز مطالبات کو اہمیت دی جائے گی تاکہ قومی وسائل کی منصفانہ تقسیم کو یقینی بنایا جا سکے۔
