کراچی — گورنر سندھ سید محمد نہال ہاشمی نے حبیب یونیورسٹی کے نویں کانووکیشن میں بحیثیت مہمانِ خصوصی شرکت کی، جہاں انہوں نے فارغ التحصیل طلبہ و طالبات میں ڈگریاں تقسیم کیں۔
انہوں نے کامیاب گریجویٹس، ان کے والدین اور اساتذہ کو مبارکباد پیش کی۔
اس موقع پر گورنر سندھ نے کہا کہ تعلیم یافتہ، خوشحال اور برداشت پر مبنی معاشرہ ہی ترقی کی اصل بنیاد ہے۔ انہوں نے زور دیا کہ معاشرے میں زبان، مسلک یا کسی بھی بنیاد پر امتیازی سلوک کی کوئی گنجائش نہیں ہونی چاہیے۔
انہوں نے نوجوانوں کو پاکستان کا سب سے قیمتی سرمایہ قرار دیتے ہوئے کہا کہ وہ اپنی صلاحیتیں ملک و قوم کی ترقی کے لیے بروئے کار لائیں۔
گورنر سندھ نے کہا کہ دنیا تیزی سے جدت، تحقیق اور ٹیکنالوجی کی جانب بڑھ رہی ہے، اس لیے نوجوانوں کو جدید مہارتوں پر توجہ دینی چاہیے۔
انہوں نے مزید کہا کہ ان شاء اللہ 2047 میں پاکستان کے قیام کے 100 سال مکمل ہوں گے، اور پاکستان عظیم جدوجہد اور بے شمار قربانیوں کے نتیجے میں وجود میں آیا۔
گورنر سندھ نے کہا کہ قومی قیادت اور مسلح افواج ملک کے امن، استحکام اور دفاع کے لیے اہم کردار ادا کر رہی ہیں۔
انہوں نے کہا کہ دفاعی صلاحیتوں کے ساتھ ساتھ اب معاشی استحکام اور ترقی کے لیے بھی اجتماعی کوششیں کرنا ہوں گی۔
آخر میں انہوں نے نوجوانوں پر زور دیا کہ وہ تعلیم، کردار اور صلاحیتوں کے ذریعے پاکستان کو ترقی و خوشحالی کی نئی منزلوں تک لے جائیں۔
