مانچسٹر: انگلش کاؤنٹی کلب لنکاشائر نے پاکستان کے تجربہ کار لیفٹ آرم اسپنر نُعمان علی کو 2026 کاؤنٹی چیمپئن شپ کے بقیہ سیزن کے لیے ٹیم میں شامل کرلیا ہے۔
39 سالہ نُعمان علی سیزن کے آخری مرحلے میں لنکاشائر کے اسپن اٹیک کو مضبوط بنائیں گے اور امکان ہے کہ وہ 20 اگست کو ایمریٹس اولڈ ٹریفورڈ میں نارتھمپٹن شائر کے خلاف میچ سے کاؤنٹی کرکٹ میں اپنا ڈیبیو کریں گے۔
نُعمان علی پاکستان کی جانب سے 2021 میں ٹیسٹ ڈیبیو کرنے کے بعد اب تک 100 سے زائد وکٹیں حاصل کرچکے ہیں اور حالیہ برسوں میں قومی ٹیم کے نمایاں ریڈ بال بولرز میں شمار ہوتے ہیں۔
ان کے کیریئر کی اہم کامیابیوں میں انگلینڈ کے خلاف 46 رنز کے عوض 8 وکٹوں کی بہترین ٹیسٹ کارکردگی شامل ہے۔ وہ 2025 میں ویسٹ انڈیز کے خلاف ٹیسٹ میچ کے دوران ہیٹ ٹرک کرنے والے پاکستان کے پہلے اسپنر بھی بنے تھے۔
گزشتہ سال اکتوبر میں جنوبی افریقہ کے خلاف لاہور ٹیسٹ میں ایک میچ میں 10 وکٹیں حاصل کرنے کے بعد نُعمان علی آئی سی سی ٹیسٹ بولنگ رینکنگ میں دوسری پوزیشن تک بھی پہنچ گئے تھے۔
لنکاشائر سے معاہدے کے بعد نُعمان علی نے انگلینڈ میں پہلی مرتبہ کاؤنٹی کرکٹ کھیلنے پر خوشی کا اظہار کیا اور کہا کہ وہ کاؤنٹی چیمپئن شپ میں شرکت کے لیے پرجوش ہیں۔
پاکستانی اسپنر نے لنکاشائر کی شاندار کرکٹ تاریخ اور پاکستان کے عظیم آل راؤنڈر وسیم اکرم کے ساتھ کلب کی وابستگی کو بھی سراہا۔ وسیم اکرم نے ماضی میں لنکاشائر کی جانب سے طویل عرصے تک کرکٹ کھیلی تھی۔
نُعمان علی نے کہا کہ وہ اپنے نئے ساتھی کھلاڑیوں کے ساتھ کھیلنے اور میدان کے اندر اور باہر ٹیم کے لیے مؤثر کردار ادا کرنے کے منتظر ہیں۔
