کراچی: پاکستان کے سابق شاٹ پٹ ریکارڈ ہولڈر ظفر ابنِ یعقوب نے اولمپک چیمپئن ارشد ندیم کو مشورہ دیا ہے کہ وہ عالمی سطح کے بہترین ایتھلیٹس کے ساتھ ٹریننگ کے لیے اپنا تربیتی مرکز یورپ منتقل کریں تاکہ جیولن تھرو میں اپنی عالمی حیثیت برقرار رکھ سکیں۔
ظفر ابنِ یعقوب نے کہا کہ عالمی سطح پر مسلسل کامیابی کے لیے ارشد ندیم کو اعلیٰ معیار کی سہولیات اور دنیا کے بہترین ایتھلیٹس کے ساتھ ٹریننگ کا تجربہ حاصل کرنا ضروری ہے۔ ان کے مطابق جرمنی ارشد ندیم کے لیے ایک موزوں تربیتی مرکز ثابت ہوسکتا ہے۔
ان کا کہنا تھا کہ یورپ میں زیادہ وقت گزارنے سے ارشد اپنی کارکردگی کا معیار برقرار رکھنے کے ساتھ پاکستان کے لیے مزید عالمی اعزازات جیتنے کی پوزیشن میں آسکتے ہیں۔
ظفر کا یہ بیان گلاسگو میں ہونے والے کامن ویلتھ گیمز میں ارشد ندیم کی مایوس کن کارکردگی کے بعد سامنے آیا ہے۔ ارشد 12 ایتھلیٹس پر مشتمل فائنل میں اپنی ابتدائی تین کوششوں کے بعد نویں نمبر پر رہے اور ٹاپ آٹھ میں جگہ بنانے میں ناکام ہوگئے۔ اس سے قبل انہوں نے 2022 کے برمنگھم کامن ویلتھ گیمز میں 90.18 میٹر کی ریکارڈ تھرو کے ساتھ گولڈ میڈل جیتا تھا۔
سابق ریکارڈ ہولڈر نے ارشد ندیم کے کوچ سلمان بٹ کو بھی ان کے ساتھ بیرون ملک تربیتی کیمپس میں جانے کا مشورہ دیا۔ ان کے مطابق ارشد اور ان کے کوچ دونوں ایک مضبوط عالمی تربیتی ماحول سے فائدہ اٹھا سکتے ہیں۔
ظفر ابنِ یعقوب نے ارشد کی فٹنس اور اسٹرینتھ اینڈ کنڈیشننگ پروگرام کو بھی مزید بہتر بنانے پر زور دیا۔ انہوں نے کہا کہ اعلیٰ سطح کی بین الاقوامی مقابلوں میں مسلسل بہترین کارکردگی کے لیے ویٹ ٹریننگ سمیت جسمانی تیاری انتہائی اہم ہے۔
انہوں نے ارشد ندیم کو قدرتی صلاحیتوں سے مالا مال ایتھلیٹ قرار دیتے ہوئے کہا کہ عالمی معیار کی کوچنگ، سہولیات اور بہترین ایتھلیٹس کے ساتھ ٹریننگ سے ان کی صلاحیتوں کو مزید نکھارا جا سکتا ہے۔
ارشد ندیم نے 2024 کے پیرس اولمپکس میں 92.97 میٹر کی ریکارڈ تھرو کے ساتھ جیولن تھرو میں پاکستان کے لیے تاریخی گولڈ میڈل جیتا تھا۔
اس کے بعد بھی ارشد نے اسلامی گیمز اور ایشین چیمپئن شپ میں گولڈ میڈلز حاصل کیے، تاہم ان کی حالیہ کامیاب تھروز اولمپکس میں قائم کیے گئے معیار سے کم رہی ہیں۔
29 سالہ ارشد ندیم نے 2023 میں بڈاپسٹ میں ہونے والی عالمی چیمپئن شپ میں سلور میڈل جیت کر بھی تاریخ رقم کی تھی اور اس ایونٹ میں پاکستان کے پہلے میڈلسٹ بنے تھے۔
ارشد ندیم کی اگلی بڑی آزمائشوں میں 11 سے 13 ستمبر تک ہنگری میں ہونے والی ورلڈ الٹی میٹ ایتھلیٹکس چیمپئن شپ اور اس کے بعد 19 ستمبر سے 4 اکتوبر تک جاپان کے شہر ایچی-ناگویا میں ہونے والے ایشین گیمز شامل ہیں۔
