دسمبر 1، 2025
ویب ڈیسک
اسلام آباد سے لاہور موٹر وے (M-2) پر جدید ترین "ویدر آن دی وے” الرٹ سسٹم نصب کیا جا رہا ہے، جو پاکستان کے کسی بھی بڑے روٹ پر پہلا جدید ترین ریئل ٹائم موسم مانیٹرنگ نیٹ ورک ہوگا۔
یہ سسٹم ویڈر والے اور ون نیٹ ورک کی مشترکہ کاوش ہے، جو موٹر وے کے مسافروں کو ہائپر لوکل ریئل ٹائم موسم کی معلومات فراہم کرے گا۔ سسٹم میں 14 آٹومیٹڈ ویڈر اسٹیشنز، 5 ایئر کوالٹی سینسرز، 4 ویژیبلیٹی سینسرز، سیٹلائٹ ڈیٹا اور جدید پیشگوئی ماڈلز شامل ہیں، جو دھند، بارش، تیز ہوا اور کم حدِ نگاہ کی صورتحال پر نظر رکھیں گے۔
ڈیسیژن سپورٹ انجن موسم کا ڈیٹا فوراً موبائل ایپس، ویب پلیٹ فارمز اور ٹول پلازوں پر نصب اسکرینوں کے ذریعے مسافروں تک پہنچائے گا۔ پہلی بار ڈرائیورز، موٹر وے حکام اور سرکاری ادارے ایک جیسے ریئل ٹائم موسم سے متعلق فیصلے کر سکیں گے۔
اس پورے نیٹ ورک سے نہ صرف سفری سہولت بہتر ہوگی بلکہ زراعت، دھند کی درست پیشگوئی، ایئر کوالٹی مانیٹرنگ، ڈینگی اور فصلوں کے کیڑے مکوڑوں کی وارننگ، لاجسٹکس، سیاحت اور ماحولیاتی تحفظ میں بھی مدد ملے گی۔
یورپی، جرمن، امریکی، سوئس اور مقامی ڈیٹا کو یکجا کرکے بنایا گیا یہ سسٹم پاکستان کو جدید موسمیاتی اور سفری ٹیکنالوجی کی نئی سطح پر لے جائے گا۔
