11 دسمبر ، 2025
ویب ڈیسک
پاسپورٹ ڈپارٹمنٹ نے ایک نیا آن لائن ویریفیکیشن سسٹم متعارف کر دیا ہے جس کا مقصد اُن تکنیکی مسائل کو حل کرنا ہے جن کا ہزاروں درخواست دہندگان کو سامنا تھا۔ یہ نیا سسٹم پاسپورٹ ویریفیکیشن کے عمل کو مزید تیز، آسان اور صارف دوست بنائے گا۔
اس اپ گریڈ کے تحت اب درخواست دہندگان نادرا کے پاک آئی ڈی موبائل ایپ کے ذریعے اپنی فنگرپرنٹس کی تصدیق کر سکتے ہیں۔ جن کیسز میں فنگرپرنٹس میچ نہ ہوں، وہاں چہرے کی شناخت (فیشل ویریفیکیشن) کا نیا آپشن بھی دستیاب ہوگا۔
ڈی جی پاسپورٹس مصطفیٰ جمال قاضی کے مطابق یہ نیا نظام خاص طور پر بیرونِ ملک مقیم پاکستانیوں کے لیے فائدہ مند ثابت ہوگا، جو پہلے بائیومیٹرک ویریفیکیشن کے لیے مشکلات کا سامنا کرتے تھے۔
انہوں نے مزید کہا کہ بزرگ شہریوں کے لیے بھی یہ عمل پہلے کے مقابلے میں کہیں زیادہ آسان ہو جائے گا، جس سے پاسپورٹ درخواست کا پورا طریقہ کار زیادہ مؤثر اور سہل بن جائے گا۔
