اسلام آباد: وزارتِ مذہبی امور نے سرکاری حج اسکیم کے تحت درخواستوں کی وصولی کی مدت میں ایک دن کی توسیع کر دی ہے۔ اس فیصلے کے بعد اب نامزد بینکوں میں پیر 18 اگست کو بھی شہری اپنی حج درخواستیں جمع کرا سکیں گے۔ وزارت کے مطابق یہ توسیع عازمین کی سہولت اور غیر جمع شدہ کوٹے کو پورا کرنے کے لیے کی گئی ہے۔
ترجمان وزارت نے بتایا کہ 12 دن کے دوران ایک لاکھ 10 ہزار سے زائد درخواستیں موصول ہو چکی ہیں، جو حکومت کی توقعات سے کہیں زیادہ ہیں۔ اس وقت سرکاری حج اسکیم میں صرف 7 ہزار نشستیں باقی ہیں، اور ان کے پُر ہونے کے بعد مزید درخواستیں وصول نہیں کی جائیں گی۔
ترجمان کے مطابق درخواستوں کی وصولی کا عمل ’’پہلے آئیے، پہلے پائیے‘‘ کی بنیاد پر جاری ہے۔ اس لیے جن شہریوں نے اب تک اپنی درخواست جمع نہیں کرائی، انہیں ہدایت کی گئی ہے کہ وہ پیر کے روز فوری طور پر قریبی نامزد بینک سے رجوع کریں تاکہ وہ اس موقع سے فائدہ اٹھا سکیں۔
حکومت نے رواں سال حج انتظامات کو شفاف اور سہل بنانے کے لیے مختلف اقدامات کیے ہیں۔ اسی سلسلے میں درخواستوں کی وصولی کا عمل مکمل طور پر بینکوں کے ذریعے کیا جا رہا ہے تاکہ کسی قسم کی بدنظمی یا بے ضابطگی سے بچاجا سکے۔
