(16 اکتوبر 2025) رمضان المبارک کی آمد قریب آتی جا رہی ہے ماہرین فلکیات اور موسمیات کی جانب سے اس حوالے سے پیشگوئی کی گئی
اسلام آباد: ماہرینِ فلکیات کے مطابق سال 2026 میں رمضان المبارک کا آغاز ممکنہ طور پر 28 فروری کو ہونے کا امکان ہے، جبکہ عیدالفطر 30 مارچ یا 31 مارچ کو متوقع ہے۔ چاند کی رویت اور موسمی حالات کے مطابق یہ تاریخیں ایک یا دو دن کے فرق سے تبدیل بھی ہوسکتی ہیں۔
ابتدائی فلکیاتی تجزیے بتاتے ہیں کہ 27 فروری 2026 کی شام کو پاکستان سمیت جنوبی ایشیا کے بیشتر حصوں میں رمضان کا چاند نظر آنے کے واضح امکانات ہیں۔ اگر چاند اس روز دکھائی دے گیا تو پہلا روزہ جمعہ 28 فروری کو رکھا جائے گا۔
محکمہ موسمیات اور سپارکو کے ماہرین کے مطابق، مارچ کے آخر میں شوال کا چاند 29 یا 30 مارچ کو دکھائی دینے کے قوی امکانات ہیں، جس کے نتیجے میں عیدالفطر پیر یا منگل کے روز منائی جا سکتی ہے۔
فلکیاتی ماہرین کا کہنا ہے کہ رمضان 2026 معمول سے کچھ پہلے شروع ہوگا، اس لیے موسم نسبتاً معتدل رہے گا، روزے کے اوقات تقریباً 13 سے 14 گھنٹے کے درمیان ہوں گے۔
ادھر مذہبی امور کے ذرائع کے مطابق رویتِ ہلال کمیٹی چاند کی شہادت کے حوالے سے حتمی اعلان کرے گی، جبکہ مختلف شہروں میں خصوصی رصدی مقامات پر چاند دیکھنے کے انتظامات کیے جائیں گے۔
رمضان اور عیدالفطر کی درست تاریخوں کا اعلان حسبِ روایت چاند دیکھنے کے بعد کیا جائے گا، تاہم فلکیاتی اندازے عوام کو پہلے سے تیاری کا موقع فراہم کرتے ہیں تاکہ عبادات اور رمضان پلاننگ بہتر طریقے سے کی جا سکے۔
