اسلام آباد (21 اگست 2025)
وزارتِ مذہبی امور نے اعلان کیا ہے کہ سرکاری حج اسکیم 2026 کے تحت صرف 1640 نشستیں باقی رہ گئی ہیں۔
ترجمان وزارت کے مطابق شدید بارشوں اور ہنگامی صورتحال کے باعث متعدد شہری بروقت درخواستیں جمع نہیں کرا سکے، اسی وجہ سے فیصلہ کیا گیا ہے کہ خالی نشستوں پر درخواستوں کی وصولی آج (جمعرات) 21 اگست کو بھی جاری رہے گی۔
وزارت کا کہنا ہے کہ اب تک صرف 13 دنوں میں ایک لاکھ 14 ہزار سے زائد درخواستیں موصول ہو چکی ہیں۔ گزشتہ روز اندازاً ساڑھے تین ہزار نشستیں باقی تھیں جو اب تیزی سے کم ہو رہی ہیں۔
اعلان میں مزید کہا گیا ہے کہ نشستیں مکمل ہوتے ہی نامزد بینکوں میں حج درخواستوں کی وصولی فوری طور پر روک دی جائے گی۔ تمام نامزد بینکوں کو ہدایات جاری کر دی گئی ہیں کہ وہ مقررہ وقت تک درخواستیں وصول کرتے رہیں۔
