پی ایم ڈی سی کے باہر طلبہ کے احتجاج کے معاملہ پر ملک بھر کے تمام صوبوں میں امتحانی ہالز بک کر لیے گئے ہیں۔
پی ڈی ایم اے کے اعلامیہ کے مطابق صوبائی حکام نے ایم ڈی کیٹ امتحان کے پُر امن انعقاد کے لیے تمام ضروری تیاریاں مکمل کر لی ہیں،امتحان میں سوالیہ پرچوں کی طباعت اور امیدواروں کے ایڈمٹ کارڈز کا اجرا بھی شامل ہے۔
اعلامیہ میں بتایا گیا کہ امیدواروں کی سہولت کے لیے پی ایم اینڈ ڈی سی نے رجسٹریشن پورٹل دو مرتبہ کھولا، سیلاب سے متاثرہ طلباء کو سہولت دینے کے لیے امتحان کی تاریخ میں ایک بار توسیع کی گئی۔
دوسری جانب ہائیکورٹ نے ایم ڈی کیٹ کی تاریخ میں مزید توسیع کے لیے دائر درخواست کو بھی مسترد کر دیا ہے، طلباء کو امتحان کی تیاری کے لیے مناسب وقت فراہم کیا گیا تھا، ایم ڈی کیٹ کے انعقاد میں مزید تاخیر ممکن نہیں۔
