لاہور: پاکستان کرکٹ بورڈ (پی سی بی) کے چیئرمین محسن نقوی نے پاکستان سپر لیگ پی ایس ایل 11 کے لیے انعامی رقم کا نیا اور بڑا اسٹرکچر متعارف کرا دیا ہے، جسے فرنچائزز اور کرکٹ شائقین دونوں جانب سے مثبت پیش رفت قرار دیا جا رہا ہے۔ نئے اعلان کے مطابق ایڈیشن 11 کی چیمپیئن ٹیم کو 500,000 امریکی ڈالر دیے جائیں گے، جو گزشتہ سال کی نسبت نمایاں اضافہ ہے۔
رنر اپ ٹیم کے لیے بھی انعامی رقم بڑھا کر 300,000 امریکی ڈالر مقرر کی گئی ہے، جبکہ پہلی بار ایک نئی کیٹیگری متعارف کرائی گئی ہے جس کے تحت وہ فرنچائز جو پاکستان میں کرکٹ کی ترقی اور گرومنگ میں سب سے مؤثر کردار ادا کرے گی، اسے خصوصی طور پر 200,000 امریکی ڈالر کا انعام دیا جائے گا۔
محسن نقوی نے کہا کہ پی ایس ایل نہ صرف پاکستان کی سب سے بڑی برانڈ ہے بلکہ یہ عالمی کرکٹ میں بھی نمایاں مقام رکھتی ہے، اس لیے انعامی رقم میں اضافہ فرنچائزز کی حوصلہ افزائی اور لیگ کے معیار میں مزید بہتری کے لیے ضروری ہے۔ ان کا کہنا تھا کہ ان اقدامات کا مقصد پاکستان کرکٹ کو نئی بلندیوں تک پہنچانا ہے۔
پی ایس ایل 11 میں اس بار آٹھ ٹیمیں شامل ہوں گی، جبکہ دو نئی فرنچائزز کی نیلامی 6 جنوری 2026 کو شیڈول ہے۔ کرکٹ حلقوں کے مطابق یہ توسیع پاکستان سپر لیگ کی بڑھتی ہوئی مقبولیت اور مالی مضبوطی کی واضح عکاسی کرتی ہے
