پاکستان کے مایہ ناز فاسٹ بولر شاہین شاہ آفریدی نے آسٹریلوی اسٹار مچل اسٹارک کو لیجنڈ کرکٹر اور نوجوان پلیئرز کے لیے مثالی شخصیت قرار دیا ہے۔
آسٹریلیا میں بگ بیش لیگ کے لیے موجود شاہین آفریدی نے گفتگو میں کہا کہ وہ لیگ میں اپنا بھرپور کردار ادا کرنے کے لیے پرعزم ہیں۔ ان کا کہنا تھا کہ اگر ضرورت پڑی تو بیٹنگ میں بھی ٹیم کے لیے بھرپور کارکردگی دکھاؤں گا۔ بگ بیش کوئی عام ٹورنامنٹ نہیں بلکہ دنیا بھر میں تسلیم شدہ ایک بڑی لیگ ہے۔
شاہین نے کہا کہ یہاں دنیا کے اعلیٰ ترین کھلاڑی حصہ لے رہے ہیں، پہلا میچ محمد رضوان کی ٹیم کے خلاف ہے، جبکہ بابر اعظم بھی آسٹریلیا میں موجود ہیں۔
انہوں نے مزید کہا کہ "وہ مجھے جانتے ہیں، میں انہیں جانتا ہوں، امید ہے کہ یہاں بہترین کرکٹ دیکھنے کو ملے گی۔ ایشین اور پاکستانی شائقین کی سپورٹ بھی ملے گی۔”
شاہین آفریدی نے بتایا کہ گزشتہ ملاقات میں انہوں نے مچل اسٹارک کو کہا تھا کہ انہوں نے 2015 ورلڈ کپ میں اسٹارک کا یادگار اسپیل بار بار دیکھا تھا۔
