کراچی: سابق قومی کرکٹ ٹیم کے کپتان شاہد آفریدی نے پاکستان کے خوبصورت شمالی علاقوں کا رخ کرنے والے سیاحوں سے اپیل کی ہے کہ وہ قدرتی ماحول کے تحفظ میں اپنی ذمہ داری ادا کریں اور سیاحتی مقامات پر کچرا پھینکنے سے گریز کریں۔
شاہد آفریدی نے سوشل میڈیا پر ایک ویڈیو شیئر کرتے ہوئے شمالی علاقوں میں پھیلنے والے کچرے کی جانب توجہ دلائی۔ ویڈیو میں پہاڑوں، جھیلوں اور آبشاروں کے خوبصورت مناظر کے ساتھ مختلف مقامات پر پلاسٹک کی بوتلیں، ریپرز اور دیگر کچرا بھی نظر آیا۔
سابق کپتان نے سیاحوں پر زور دیا کہ وہ ان علاقوں کی خوبصورتی سے لطف اندوز ہوں، یادگار لمحات ساتھ لے کر جائیں لیکن اپنے پیچھے کچرا نہ چھوڑیں۔ انہوں نے خود بھی علاقے میں موجود کچرا اٹھایا اور صفائی کی اہمیت اجاگر کی۔
آفریدی نے بتایا کہ کچرے کے مسئلے سے نمٹنے کے لیے علاقے میں مختلف مقامات پر ڈسٹ بنز رکھنے کا انتظام بھی کیا جا رہا ہے تاکہ سیاح کچرا مناسب جگہ پر پھینک سکیں۔
دورے کے دوران مقامی بچوں نے شاہد آفریدی سے اپنے علاقے میں کرکٹ پچ بنانے کی خواہش کا بھی اظہار کیا۔ سابق کرکٹر نے بچوں کی درخواست پر انہیں یقین دلایا کہ وہ اس سلسلے میں اپنا کردار ادا کرنے کی کوشش کریں گے اور 14 اگست، یوم آزادی سے قبل کرکٹ پچ کی تعمیر مکمل کرانے کی کوشش کی جائے گی۔
شاہد آفریدی کی اس سرگرمی میں ماحولیاتی تحفظ کے ساتھ ساتھ دور دراز علاقوں میں رہنے والے بچوں کے لیے کھیلوں کی سہولیات بہتر بنانے کا پیغام بھی نمایاں ہوا۔
سابق قومی کپتان اس سے قبل بھی مختلف فلاحی اور کمیونٹی منصوبوں میں حصہ لیتے رہے ہیں، بالخصوص ایسے اقدامات میں جن کا مقصد بچوں کی مدد اور پسماندہ علاقوں میں سہولیات کی فراہمی ہے۔
